काठमाडौं । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह भावी प्रधानमन्त्रीका घोषित उम्मेदवार हुन् ।

उनले यसअघि काठमाडौं महानगरपालिकाका प्रमुखको भूमिका तीन वर्ष निर्वाह गरे । उनै बालेनलाई रास्वपाले भावी प्रभानमन्त्रीका उम्मेदवारमा अघि सारेको छ ।

यस्तोमा नेपालवानएचडीले भुइँ मान्छेहरू चाहिँ बालेनलाई कसरी लिन्छन् ? बालेनप्रतिको बुझाइ उनीहरूमा कस्तो छ ? जान्न चाहेका थियौँ ।

त्यसक्रममा सडक आसपासमा सानोतिनो व्यापार गर्ने एक अर्धवैंशे महिलालाई सोध्यौँ– बालेन शाहलाई प्रधानमन्त्री भन्दैछन्, थाहा छ ?

जवाफमा उनले भनिन्, ‘त्यो त थाहा भएन । कसलाई के भन्छन् ? भन्छन्, हामीलाई थाहा हुँदैन ।’ फेरि प्रश्न गर्‍यौँ– तपाईं त काठमाडौंको वासी हो नि त । बालेन मेयर हुँदा केही काम गर्नुभयो कि भएन उहाँले ?

उनले फ्याट्टै भनिन्, ‘बालेन मेयर हुँदा हाम्रो त भएभरको सामान लगे त्यत्ति हो ।’ बालेन मेयर हुँदा उनले गरेको थप कामबारे पनि उनको धारणा बुझ्न चाह्यौँ र सोध्यौँ– तर, काम गर्नु भयो कि भएन ?

उनले बालेनले आफ्ना ठाउँमा गरेको होलान् भन्दै आफूहरूका लागि केही नगरेको बताइन् । उनले बालेनले आफूहरूलाई उठाउने मात्रै काम गरेको भन्दै गुनासो गरिन् ।

बालेन मेयर हुँदा काठमाडौं महानगर क्षेत्रको सडक र सडक किनारमा ठेला गाडामा मकै पोल्ने र तरकारी बेच्नेहरूले हत्तु हैरान बेहोरेका थिए ।

बालेन त्यसबेला भुइँमान्छे विरोधी मेयर भन्दै आलोचित भएका थिए ।