काठमाडौं। राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले पार्टीको घोषणापत्र सार्वजनिक गर्दै भ्रष्टाचारविरुद्ध कठोर अभियान सञ्चालन गर्ने घोषणा गरेका छन्। घोषणापत्र सार्वजनिक कार्यक्रममा बोल्दै उनले ‘नष्ट हुन्छौं, भ्रष्ट हुँदैनौं’ भन्ने मूल नारासहित राजनीतिक शुद्धीकरणको प्रतिबद्धता व्यक्त गरे।

लिङ्देनले २०४० सालपछि सार्वजनिक पदमा रहेका उच्च पदस्थ नेता तथा कर्मचारीहरूको सम्पत्ति छानबिन गर्न उच्चस्तरीय नागरिक आयोग गठन गरिने बताए। ‘अवैध सम्पत्ति जफत गर्ने स्पष्ट कानुनी व्यवस्था मिलाइन्छ,’ उनले भने, ‘भ्रष्टाचारका जरा उखेल्न कानुन र कार्यान्वयन दुवै बलियो बनाइन्छ।’

उनले भ्रष्टाचारसम्बन्धी सूचना दिनेलाई संरक्षण र प्रोत्साहन गर्न सूचक संरक्षण ऐन ल्याइने जानकारी दिए। सार्वजनिक पद धारण गर्ने पदाधिकारीलाई कानुनी दायरामा ल्याउन कन्फ्लिक्ट अफ इन्टरेस्ट (स्वार्थको द्वन्द्व) सम्बन्धी कानून जारी गरिने उनको भनाइ थियो।

न्यायपालिकामा देखिएको विकृति र विसङ्गती अन्त्य गर्न पुनर्संरचना र पुनर्नियुक्तिको व्यवस्था गरिने उल्लेख गर्दै लिङ्देनले न्याय प्रणालीको गुमेको विश्वसनीयता पुनर्स्थापना गरिने बताए। ‘न्यायपालिका पूर्ण रूपमा स्वतन्त्र र जनविश्वास योग्य बनाइन्छ,’ उनले भने।

राष्ट्रिय सुरक्षालाई मूल ध्येयका रूपमा अघि सार्दै उनले नेपाली सेनाको परम्परागत गौरव अक्षुण्ण राख्दै आवश्यक सुधार गरिने बताए। सेनाको शिप, विकास र दक्षता अभिवृद्धिलाई प्राथमिकता दिइने उनले स्पष्ट पारे।

त्यसैगरी नेपाल प्रहरी, सशस्त्र प्रहरी बल र राष्ट्रिय अनुसन्धान विभागलाई राजनीतिक हस्तक्षेपमुक्त, सबल र उच्च मनोबलयुक्त संस्थाका रूपमा विकास गरिने प्रतिबद्धता व्यक्त गरियो।

परराष्ट्र नीतिबारे बोल्दै लिङ्देनले ‘सबैसँग मित्रता स्वीकार्य, हस्तक्षेप अस्वीकार्य’ भन्ने सिद्धान्त अवलम्बन गरिने बताए। ‘नेपाल प्रथम, नेपाली प्रथम हाम्रो मार्गदर्शक सिद्धान्त हुनेछ,’ उनले जोड दिए।

राप्रपाले सार्वजनिक गरेको घोषणापत्रमा सुशासन, राष्ट्रियता र संस्थागत सुधारलाई प्राथमिकतामा राखिएको उल्लेख गरिएको छ।