काठमाडौं । राष्ट्रिय प्रजातन्त्र पार्टीका महामन्त्री डा. धवलशम्सेर राणाले राष्ट्रिय एकताको प्रतीकमा एकाग्र भएर सबै नेपाली र विशेष गरेर नवयुवा पुस्ताको हितमा सार्थक प्रतिफल नव वर्ष २०८३ मा प्राप्त गर्नुपर्ने भन्दै शुभकामना दिएका छन् ।

नयाँ वर्षको अवसरमा जारी शुभकामना सन्देशमा राष्ट्रवादी नेता राणाले भने, ‘पृथ्वीपथको जगमा र स्वदेश नै स्वर्ग भन्ने आदर्शअनुकूल नयाँ वर्ष राष्ट्रिय एकता, आर्थिक विकास र नवप्रवर्तनको कोशेढुंगा बनोस् भन्ने कामना गर्दछु ।’

उनले थप भने, ‘निर्वाचन २०८२ पछिका दिनहरुमा जनस्तरमा नयाँ आशा पलाएको छ । सरकारको तर्फबाट आशाप्रद केही प्रयासहरु अघि बढेका छन् । निश्चितरुपमा सामाजिक रोगको रुपमा झाँगिएको भ्रष्टाचारको अन्त्य गर्नैपर्ने बाध्यता छ । रोजगारको सिर्जना, महंगी र वैदेशिक ऋणभारको बढ्दो चुनौति कायमै छ ।’

राजनीतिक क्षितिजमा देखिएका आशाको किरणका बाबजुद राष्ट्रियता, अन्तर्राष्ट्रिय सम्बन्ध एवं कुटनीतिको क्षेत्रमा धेरै काम हुन बाँकि नै रहेको उनको भनाइ छ ।

नववर्ष २०८३ को अवसरमा देशविदेश रहने सबै नेपालीजनलाई शुभकामना दिँदै राणाले देश र समाजमा शान्ति, स्थायित्व र समृद्धी कायम होस्, भ्रष्टाचारको अन्त्य र सुशासन स्थापित होस् भन्ने कामना गरेका छन् ।