काठमाडौं जेनजी अभियन्ता रक्षा बमले नेपाली कांग्रेसका सभापति गगन थापाको खोजी गरेकी छिन् । शनिवार सामाजिक सञ्जालमा एक स्टाटस लेख्दै उनले प्रतिपक्ष खोई भन्दै गगनलाई धेरै प्रश्नहरु गरेकी छिन् ।

प्रतिपक्षको भूमिका कमजोर देखिएको भन्दै उनले हामीलाई प्रतिपक्ष बलियो आवाज चाहिएको बताएकी छिन् । उनले गगनलाई कमजोर नबन्न पनि बनेकी छिन् । उनले लेखेकी छिन् –

प्रतिपक्ष खोई, गगन?
झन्डै दुई तिहाइको सरकारले आफ्नो शक्तिको प्रयोग गर्दै अगाडि बढिरहेको सन्दर्भमा, पछिल्ला केही घटनाहरूले हामीलाई गम्भीर बनाएका छन्। एक जना महिलालाई प्रहरीले घाँटी निमोठ्दै गरेको भिडियो पनि सामाजिक सञ्जालमा हामीले देख्यौँ। एउटी आमाले आफ्नो बच्चालाई च्याप्पै समाएर रूदै गर्दा, बालबालिकाहरूले आफ्नो घर डोजरले भत्किँदै गरेको हेर्दै गर्दा, व्यापारीहरूलाई लखेटिँदै गर्दा, लाठी लगाएर तर्साइँदै गर्दा, तपाईं किन मौन हुनुहुन्छ, गगन? “सुध्रिएको कांग्रेस” वा “नवीन कांग्रेस” भन्ने कुरा सत्ता हातमा हुँदा मात्र देखाउने योजना थियो र? प्रतिपक्षका लागि कांग्रेस होइन र? नेता जुनसुकै पक्षमा होस्, ऊ अन्ततः जनताकै पक्षमा हुनुपर्छ। जनताकै पीडा र जनताकै मुद्दा बोक्नुपर्छ।

संसदमा दोस्रो ठूलो दलको सभापति भएको नाताले, प्रतिपक्षमा हुँदा तपाईंको भूमिका झन् ठूलो र झन् जिम्मेवार हुन्छ जस्तो लाग्छ। आज प्रतिपक्ष कमजोर देखिएको छ। सत्तामा बसेकाहरूले जनताको आवाज नसुन्न सक्छन्, तर त्यो आवाज सुनाउनका लागि भए पनि प्रतिपक्ष बोल्नुपर्छ। हामीलाई प्रतिपक्ष बलियो आवाज चाहिएको छ।
जनताको घाँटी निमोठ्न कसैलाई पनि छुट छैन। जनताले यो सरकारलाई इतिहास रच्न मत दिएका हुन्, इतिहासबाट खस्ने कामहरू नगर्नुहोस्। 🙏