सुनसरी। कोशी प्रदेशका विभिन्न जिल्लामा प्रतिबन्धित लागूऔषध ब्राउन सुगरको कारोबार दिनप्रतिदिन बढ्दै गएको पाइएको छ। पछिल्लो एकै दिनमा सुनसरी, झापा, मोरङ र उदयपुरबाट आठ जना कारोबारी पक्राउ परेका छन्। निरन्तर भइरहेको पक्राउले प्रदेशमा लागूऔषध कारोबार विस्तार हुँदै गएको र यसको नियन्त्रण चुनौतीपूर्ण बन्दै गएको संकेत गरेको छ।

कोशी प्रदेश प्रहरी कार्यालयका सहायक प्रवक्ता सुमनकुमार तिम्सिनाका अनुसार ब्राउन सुगर कारोबारमा संलग्न गिरोहका आठ जनालाई पक्राउ गरिएको हो। सुनसरीको भोक्राहा नरसिंह गाउँपालिका–३ बाट सैफ अली सिदिकी २० ग्राम ब्राउन सुगरसहित पक्राउ परेका छन् भने कोशी गाउँपालिका–१ बाट हरिबहादुर श्रेष्ठ ५३० मिलिग्राम ब्राउन सुगरसहित नियन्त्रणमा लिइएका छन्।

त्यस्तै, झापाको अर्जुनधारा नगरपालिका-११ मा चेकजाँचका क्रममा संजोग राई, रुपेश दर्जी र अमृत दर्जीलाई २७ ग्रामभन्दा बढी ब्राउन सुगरसहित पक्राउ गरिएको छ। मोरङको विराटनगर-१६ बाट समिर चौधरी २१० मिलिग्राम ब्राउन सुगरसहित नियन्त्रणमा लिइएको प्रहरीले जनाएको छ।

प्रहरीका अनुसार लागूऔषध कारोबारमा संलग्न समूहहरू सक्रिय रूपमा फैलिँदै गएका कारण नियन्त्रणका लागि थप निगरानी र कडाइ आवश्यक देखिएको छ। पक्राउ परेकाहरूमाथि आवश्यक अनुसन्धान अघि बढाइएको प्रहरीले जनाएको छ।