काठमाडौं । नाडा अटोमोबाइल्स एशोसिएशन अफ नेपाल (नाडा) ले निजी क्षेत्रका प्रतिष्ठित उद्यमी तथा आफ्नो पूर्व अध्यक्ष शेखर गोल्छा पक्राउप्रति आपत्ति जनाएको छ।

नाडाले विज्ञप्ति जारी गर्दै अनुसन्धानका नाममा व्यवसायीहरूलाई हठात् पक्राउ गर्ने कार्यले लगानीकर्ताको मनोबल कमजोर हुने ठहर गरेको छ।

संस्थाले शेखर गोल्छालाई नेपालको औद्योगिक तथा व्यावसायिक क्षेत्रको सम्मानित व्यक्तित्वका रूपमा चित्रण गर्दै उनको नेतृत्वले निजी क्षेत्रलाई नयाँ दिशा दिनुका साथै देशको आर्थिक विकासमा महत्वपूर्ण योगदान पुर्‍याएको उल्लेख गरेको छ।

विज्ञप्तिमा भनिएको छ, ‘यस्तो गरिमामय इतिहास बोकेको र देशकै ठूलो औद्योगिक घरानाको नेतृत्व गरिरहनु भएको व्यक्तित्वमाथि गरिने कुनै पनि अन्यायपूर्ण व्यवहारले समग्र उद्योगी व्यवसायीमा नकारात्मक सन्देश जान्छ।’

नाडाले राज्यले गर्ने सत्यतथ्य छानबिन र अनुसन्धान प्रक्रियामा निजी क्षेत्र सधैं सहयोग गर्न तयार रहेको स्पष्ट पार्दै, अनुसन्धानकै नाममा व्यवसायीलाई थुनामा राख्ने प्रवृत्तिको विरोध गरेको छ।

संस्थाका अनुसार, निजी क्षेत्रलाई प्रोत्साहन गर्दै लगानी भित्र्याउनुपर्ने समयमा प्रतिष्ठित व्यवसायीमाथि हुने यस्ता कदमले स्वदेशी तथा विदेशी लगानीकर्तामा त्रासको वातावरण सिर्जना हुने र यसले सरकारको ‘लगानीमैत्री नेपाल’ भन्ने नीतिलाई कमजोर बनाउने देखिन्छ।

नाडाले शेखर गोल्छाको हकमा पक्राउ नगरी छानबिन प्रक्रिया अघि बढाउन सरकार र सम्बन्धित निकायसँग आग्रह गरेको छ।

त्यसैगरी, दोषी प्रमाणित नभएसम्म कुनै पनि प्रतिष्ठित नागरिकको आत्मसम्मान र व्यावसायिक प्रतिष्ठा जोगाउनु राज्यको जिम्मेवारी भएको भन्दै संस्थाले गोल्छाले अनुसन्धानमा पूर्ण सहयोग गर्नेमा आफूहरू विश्वस्त रहेको जनाएको छ।

नाडाले निजी क्षेत्रलाई सुरक्षित र सम्मानित वातावरण प्रदान गर्दै आर्थिक समृद्धिको यात्रामा सरकारसँग सहकार्य गर्न पनि आग्रह गरेको छ।