पाँचथर । राष्ट्रिय स्वतन्त्र पार्टी (रास्वपा) पाँचथरको प्रथम जिल्ला अधिवेशन सम्पन्‍न भएको छ।

जिल्ला समन्वय समिति पाँचथरको सभाहलमा आयोजित अधिवेशनले नयाँ जिल्ला कार्यसमिति सर्वसम्मत रूपमा चयन गर्नुका साथै विभिन्‍न राजनीतिक दल परित्याग गरेकानेता तथा कार्यकर्तालाई पार्टीमा स्वागत गरेको छ।

अधिवेशनबाट प्रकाश गुरुङ सर्वसम्मत जिल्ला अध्यक्ष चयन भएका छन्। उपाध्यक्षमा सहरसिंह तामाङ, सचिवमा कुशल जवेगू, सहसचिवमा कविहाङ सेलिङ तथा कोषाध्यक्षमा सिर्जना रिजाल चयन भएका छन्।

सदस्यहरूमा ज्ञानेन्द्र रसाइली, रुद्र चम्लागाईँ, रेखा लावती, सविना राई, ईश्वरीप्रसाद निरौला, खगेन्द्र सिग्देल, प्रयागराज सुवेदी तथा इन्द्र लावती सर्वसम्मत रूपमा निर्वाचित भएका छन्। सदस्य निर्वाचित सुवेदी राप्रपाका जिल्ला उपाध्यक्ष थिए । करिब तीन दशक राप्रपाकाे राजनीति गरेका उनी हालै रास्वपा प्रवेश गरेका थिए ।

यस्तै, अधिवेशनले केन्द्रीय प्रतिनिधिका रूपमा महेन्द्रविक्रम थाम्सुहाङ, चन्द्रराज आङ्देम्बे, भीम शिवाकोटी र माया चौहानलाई चयन गरेको छ। प्रदेश प्रतिनिधिमा लक्ष्मण लावती र सिर्जना रिजाल चयन भएका छन्।

अधिवेशनकै अवसरमा विभिन्‍न राजनीतिक दल परित्याग गरी १५० भन्दा बढी नेता तथा कार्यकर्ता रास्वपामा प्रवेश गरेका छन्।

नवप्रवेशीहरूलाई पार्टी अध्यक्ष गुरुङले स्वागत गर्दै वैकल्पिक राजनीति, सुशासन, पारदर्शिता तथा जनउत्तरदायी शासन स्थापनाका लागि एकताबद्ध भएर काम गर्न आह्वान गरे ।

कार्यक्रममा बोल्ने वक्ताहरूले रास्वपाप्रति जनआकर्षण निरन्तर बढिरहेको दाबी गर्दै नवगठित समितिले जिल्लामा पार्टी संगठन विस्तार, जनसरोकारका मुद्दाको उठान तथा प्रभावकारी राजनीतिक हस्तक्षेप गर्न सक्ने विश्वास व्यक्त गरे।

विभिन्‍न राजनीतिक दलका प्रतिनिधि, सामाजिक अगुवा, बुद्धिजीवी तथा सर्वसाधारणको उल्लेखनीय उपस्थितिमा सम्पन्‍न अधिवेशनले पाँचथरमा रास्वपाको संगठनात्मक आधार थप बलियो बनेको दाबी गरिएकाे छ ।

नवनिर्वाचित अध्यक्ष गुरुङले जनताको अपेक्षाअनुसार स्वच्छ, पारदर्शी र उत्तरदायी राजनीतिक अभ्यासलाई संस्थागत गर्दै जिल्लामा पार्टीलाई थप सशक्त बनाउने प्रतिबद्धता व्यक्त गरेका छन् ।