काठमाडौं । नेपाली बजारमा शुक्रबार सुनको मूल्यमा उल्लेख्य वृद्धि भएको छ। नेपाल सुनचाँदी व्यवसायी महासंघका अनुसार यस दिन सुनको भाउ प्रतितोला ५ हजार ३ सय रुपैयाँले बढेर २ लाख ९२ हजार रुपैयाँ कायम भएको छ।

अघिल्लो कारोबार दिन बिहीबार सुन प्रतितोला २ लाख ८६ हजार ७ सय रुपैयाँमा कारोबार भएको थियो। यद्यपि, पछिल्लो एक साताको अवधिलाई हेर्दा सुनको मूल्यमा अझै पनि गिरावट देखिएको छ। गत शुक्रबार सुनको भाउ प्रतितोला ३ लाख ९ हजार रुपैयाँ रहेको थियो, जसको तुलनामा हाल १७ हजार रुपैयाँले कम हो।

यस्तै, चाँदीको मूल्य पनि शुक्रबार बढेको छ। महासंघका अनुसार चाँदी प्रतितोला १९० रुपैयाँले बढेर ४ हजार ८४० रुपैयाँ पुगेको छ। अघिल्लो दिन चाँदी ४ हजार ६५० रुपैयाँमा कारोबार भएको थियो।

तर, सुनझैं चाँदीको मूल्य पनि एक साताअघि रहेको स्तरभन्दा तलै छ। गत शुक्रबार चाँदी प्रतितोला ५ हजार २३० रुपैयाँमा कारोबार भएको थियो।