काठमाडौं। अमेरिकी प्रविधि कम्पनी अमेजनले भारतमा कृत्रिम बुद्धिमत्ता (एआई) र क्लाउड पूर्वाधार विस्तारका लागि सन् २०३० सम्म थप १३ अर्ब अमेरिकी डलर लगानी गर्ने घोषणा गरेको छ।

यो लगानी यसअघि घोषणा गरिएको ३५ अर्ब डलरको योजनाबाहेकको हो। नयाँ प्रतिबद्धतासँगै सन् २०३० सम्म भारतमा अमेजनको कुल लगानी ४८ अर्ब डलर पुग्नेछ।

रोयटर्सका अनुसार उक्त घोषणा अमेजनका प्रमुख कार्यकारी अधिकृत एन्डी ज्यासी र भारतीय प्रधानमन्त्री नरेन्द्र मोदीबीच बिहीबार नयाँ दिल्लीमा भएको भेटवार्तापछि सार्वजनिक गरिएको हो।

एन्डी ज्यासीले सामाजिक सञ्जाल एक्समार्फत भारतमा आगामी पाँच वर्षभित्र ४८ अर्ब डलर लगानी गर्ने योजना साझा गरिएको जानकारी दिएका छन्। उनका अनुसार यसमध्ये २१ अर्ब डलरभन्दा बढी रकम एआई र क्लाउड पूर्वाधार विकासमा खर्च गरिनेछ।

अमेजनका अनुसार थप १३ अर्ब डलरको लगानी मुख्यतः मुम्बई र हैदराबादमा एआई तथा क्लाउड पूर्वाधार विस्तारमा केन्द्रित हुनेछ। यसबाट डाटा सेन्टरको क्षमता वृद्धि, क्लाउड सेवा विस्तार तथा एआईसम्बन्धी प्रविधि विकासलाई गति मिल्ने अपेक्षा गरिएको छ।

पछिल्ला वर्षहरूमा विश्वका प्रमुख प्रविधि कम्पनीहरूले भारतलाई एआई, क्लाउड कम्प्युटिङ र डाटा पूर्वाधार विस्तारका लागि प्राथमिक गन्तव्य बनाउँदै आएका छन्। ठूलो डिजिटल बजार, तीव्र रूपमा बढ्दो इन्टरनेट प्रयोगकर्ता संख्या र सरकारी डिजिटल नीतिका कारण भारत विश्वव्यापी प्रविधि लगानीको प्रमुख केन्द्रका रूपमा उदाइरहेको विश्लेषण गरिएको छ।

यसअघि माइक्रोसफ्टले पनि भारतमा एआई र क्लाउड पूर्वाधार विस्तारका लागि १७.५ अर्ब डलर लगानी गर्ने प्रतिबद्धता जनाएको थियो। त्यस्तै, गुगलले आगामी पाँच वर्षभित्र एआई डाटा सेन्टर निर्माण तथा सम्बन्धित पूर्वाधार विकासका लागि १५ अर्ब डलर लगानी गर्ने योजना सार्वजनिक गरिसकेको छ।

प्रविधि क्षेत्रका यी ठूला लगानीले भारतमा डिजिटल पूर्वाधार सुदृढ हुनुका साथै एआई अनुसन्धान, क्लाउड सेवा विस्तार र उच्च दक्ष जनशक्ति विकासमा समेत उल्लेखनीय योगदान पुग्ने अपेक्षा गरिएको छ।