काठमाडौं। राष्ट्रिय स्वतन्त्र पार्टी (रास्वपा) की सांसद् विदुषी राणाले कर्णालीसहित देशका दुर्गम हिमाली क्षेत्रमा अझै पनि आधारभूत सञ्चार सेवाको अभाव रहेको भन्दै सरकारले तत्काल प्रभावकारी पहल गर्नुपर्ने माग गरेकी छन्।

सोमबार प्रतिनिधिसभाको बैठकमा बोल्दै उनले काठमाडौंमा फाइभजी प्रविधिको चर्चा भइरहँदा कर्णाली र अन्य विकट हिमाली क्षेत्रका नागरिक कमजोर टुजी सेवामै सीमित हुन बाध्य भएको बताइन्।

उनले विशेषगरी माथिल्लो डोल्पाको शे-फोक्सुण्डो, डोल्पो बुद्ध र छार्का ताङसोङ गाउँपालिकाका बासिन्दाले सञ्चार सेवाको अभावका कारण शिक्षा, स्वास्थ्य, बैंकिङ तथा सरकारी सेवा प्राप्त गर्न कठिनाइ भोगिरहेको उल्लेख गरिन्। यस्तै अवस्था हुम्ला, मुगु, बाजुरा, जाजरकोटलगायत अन्य दुर्गम पहाडी तथा हिमाली जिल्लामा पनि रहेको उनको भनाइ थियो।

‘काठमाडौंको एउटा विद्यार्थीले एक क्लिकमै संसारकै उत्कृष्ट कक्षाकोठासँग जोडिन सक्छ, तर डोल्पा र हुम्लाका विद्यार्थीले सामान्य इन्टरनेट सिग्नल खोज्न पनि पहाड चढ्नुपर्ने अवस्था छ,’ उनले भनिन्।

सांसद् राणाले गर्भवती महिलाले स्वास्थ्यकर्मीको परामर्श लिन, किसानले बजारको जानकारी पाउन तथा युवाले अनलाइन अवसर खोज्नसमेत सञ्चार पहुँचको अभावसँग संघर्ष गर्नुपरेको उल्लेख गरिन्।

दुर्गम क्षेत्रका नागरिकका लागि सञ्चार सेवा विलासिता नभई ‘जीवनरेखा’ भएको बताउँदै उनले कर्णालीसहित देशभरका दुर्गम हिमाली क्षेत्रमा आगामी कार्तिक महिनाभित्र भरपर्दो सञ्चार सेवा विस्तार गर्न सरकारसँग आग्रह गरिन्।