काठमाडौं । एमाले सांसद रामकुमारी झाँक्रीले सरकारले अनिर्वाचित व्यक्तिहरूलाई सिंहदरबारभित्र प्रभावशाली भूमिका दिइएको भन्दै त्यसको संवैधानिक आधारबारे प्रश्न उठाएकी छन्।

मंगलबार राष्ट्रियसभाको बैठकमा बोल्दै उनले सुशासनको नारा दिएर गठन भएको सरकारले मन्त्रालयहरूमा ठूलो संख्यामा सल्लाहकार तथा कर्मचारी नियुक्त गरेको विषयप्रति आपत्ति जनाइन्।

‘ब्युरोक्रेसीमा रहेका धेरै मानिसहरूले धमाधम राजीनामा दिएको भन्ने छ। मन्त्रीहरूका पछाडि दर्जनौँ विशिष्ट श्रेणी, प्रथम श्रेणी र द्वितीय श्रेणीका अधिकृतसरह सुविधा पाउने गरी नियुक्ति गरिएको भन्ने कुरा आइरहेका छन्। यो के हो ?’ उनले प्रश्न गरिन्।

झाँक्रीले स्थायी प्रशासनिक संयन्त्रलाई नै कमजोर बनाउने गरी समानान्तर संरचना खडा गर्न खोजिएको आरोप लगाउँदै सरकारले स्पष्ट जवाफ दिनुपर्ने बताइन्।

‘सुशासनको नारा दिएर आएका मान्छेहरूले सोपानमा आधारित ब्युरोक्रेसी र प्रशासन पनि नचलाउने, अनिर्वाचितहरूले सिंहदरबारमा शासन चलाउने तरिका के हो ?’ उनले भनिन्।

उनले ती नियुक्तिहरू कुन कानुनी तथा संवैधानिक व्यवस्थाअन्तर्गत गरिएको हो भन्नेबारे सरकारले संसदलाई स्पष्ट जानकारी गराउनुपर्ने मागसमेत गरिन्।