काठमाडौं । ह्वाट्सएपले प्रयोगकर्ताको गोपनीयता र सुरक्षालाई थप मजबुत बनाउन ‘च्याट लक’  फिचर उपलब्ध गराएको छ। यो फिचर प्रयोग गरेर प्रयोगकर्ताले आफूले चाहेका व्यक्तिगत वा संवेदनशील च्याटहरूलाई मुख्य च्याट सूचीबाट हटाएर छुट्टै सुरक्षित फोल्डरमा राख्न सक्छन्। यसले अरूले फोन प्रयोग गरे पनि ती च्याटहरू सहजै हेर्न नसक्ने बनाउँछ।

च्याट लक सक्रिय भएपछि सम्बन्धित च्याट खोल्नका लागि फोनको फिङ्गरप्रिन्ट, फेस अनलक वा प्रयोगकर्ताले सेट गरेको छुट्टै गोप्य कोड आवश्यक पर्छ। यसले निजी कुराकानीमा अनधिकृत पहुँच रोक्न मद्दत गर्छ। व्यक्तिगत च्याट मात्र होइन, ग्रुप च्याट र म्युट गरिएका च्याटहरूमा समेत यो सुविधा प्रयोग गर्न सकिन्छ।

यदि प्रयोगकर्ताले आफ्नो डिभाइसमा ‘टु-स्टेप भेरिफिकेसन’ सक्रिय गरेका छैनन् भने, च्याट लक प्रयोग गर्नुअघि ह्वाट्सएपले उक्त सुरक्षा सुविधा अन गर्न सुझाव दिन्छ। च्याट लक गर्नका लागि सम्बन्धित च्याटमा गएर ‘लक च्याट’ विकल्प चयन गर्नुपर्छ भने आवश्यकता अनुसार त्यसलाई ‘अनलक’ पनि गर्न सकिन्छ। च्याट लक वा अनलक गर्दा सम्बन्धित व्यक्तिलाई कुनै सूचना (नोटिफिकेसन) भने पठाइँदैन।

ह्वाट्सएप वेब प्रयोग गर्नेहरूले पनि लक गरिएका च्याट हेर्न सक्नेछन्। तर त्यसका लागि मोबाइल डिभाइसमा पहिले नै छुट्टै गोप्य कोड सेट गरिएको हुनुपर्छ। सोही कोड प्रयोग गरेर मात्र वेबमा पनि सुरक्षित च्याटमा पहुँच गर्न सकिन्छ।

लक गरिएका च्याटहरू हेर्न प्रयोगकर्ताले ‘लक्ड च्याट्स’ फोल्डर खोल्नुपर्ने हुन्छ। त्यसपछि फिङ्गरप्रिन्ट, फेस अनलक वा आफूले बनाएको गोप्य कोड प्रयोग गरेर च्याटमा प्रवेश गर्न सकिन्छ। चाहिएको खण्डमा यो ‘लक्ड च्याट्स’ फोल्डरलाई पनि लुकाउन सकिन्छ, जसले गर्दा सही गोप्य कोड नहालेसम्म त्यो फोल्डर नै देखिँदैन।

गोप्य कोड भने फोन अनलक गर्ने पासकोडभन्दा फरक राख्न सकिन्छ। एन्ड्रोइड र आइफोन दुवैमा प्रयोगकर्ताले आफ्नो रोजाइअनुसार छुट्टै गोप्य कोड बनाउन सक्छन्। यसले सुरक्षा झन् बलियो बनाउने ह्वाट्सएपको दाबी छ।

ह्वाट्सएपका अनुसार नयाँ फोनमा ब्याकअप र रिस्टोर गरेपछि पनि पहिले लक गरिएका च्याटहरू सुरक्षित अवस्थामै रहनेछन्। तर ती च्याटहरू हेर्नुअघि नयाँ डिभाइसमा ‘डिभाइस भेरिफिकेसन’ प्रक्रिया पूरा गर्नुपर्ने हुन्छ। यद्यपि, एउटा कुरा भने ध्यान दिनुपर्ने छ-लक गरिएका च्याटमा रहेका सम्पर्कबाट आउने फोन कलहरू भने यो फिचरले रोक्दैन।

बढ्दो डिजिटल प्रयोगसँगै व्यक्तिगत जानकारीको सुरक्षा पनि महत्वपूर्ण बन्दै गएको छ। यस्तो अवस्थामा ह्वाट्सएपको ‘च्याट लक’ फिचरले प्रयोगकर्तालाई आफ्ना निजी कुराकानी सुरक्षित राख्ने सरल र प्रभावकारी विकल्प उपलब्ध गराएको छ।