काठमाडाैं। ‘गाउँ सार्नुपर्ने स्थिति छ?’

 ‘त्यसो भए गाउँ सारे भइहाल्थ्यो नि!’

उल्लेखित अभिव्यक्ति भौतिक पूर्वाधार मन्त्री सुनिल लम्सालले अनुगमनका क्रममा सिन्धुपाल्चोकका स्थानीय नागरिकलाई दिएका हुन्।

यस अभिव्यक्तिका कारण मन्त्री लम्साल पुनः विवादमा तानिएका छन्। अनुगमनका क्रममा उनी सिन्धुपाल्चोकको भोटेकोशी गाउँपालिका पुगेका थिए। त्यहाँ स्थानीयले सडक विस्तारबारे प्रश्न उठाउँदा उनले ‘गाउँ सार्नुपर्ने स्थिति छ?’ भन्दै प्रतिप्रश्न गरेका थिए। त्यसपछि ‘त्यसो भए गाउँ सारे भइहाल्थ्यो नि!’ भन्ने अभिव्यक्ति दिएका थिए।

यसअघि पनि लम्साल ‘ठेकेदारको खुट्टा भाँच्ने’ अभिव्यक्तिका कारण विवादमा परेका थिए। धादिङको निर्माणाधीन सडकको अनुगमनका क्रममा उनले समयमै बिजुलीका पोल नहटाएको भन्दै ठेकेदारको ‘खुट्टा भाँच्न’ निर्देशन दिएपछि चौतर्फी आलोचना भएको थियो।

त्यसपछि तनहुँको शुक्लागण्डकी नगरपालिकामा रास्वपा नेता तथा कार्यकर्तासँगको भेटघाटका क्रममा दिएको अर्को अभिव्यक्तिले पनि उनी विवादमा तानिएका थिए। त्यहाँ उनले जनताका काम नगर्ने मेयर तथा मन्त्रीलाई थुन्ने बताएका थिए।

त्यहाँ मन्त्री लम्सालले भनेका थिए, ‘कुनै मेयरले काम गर्नुभएन, जनतालाई अपहेलना गर्नुभयो वा सेवाप्रवाहमा लापरबाही गर्नुभयो भने त्यसबारे हामीलाई जानकारी गराउनुहोला। मेयरलाई पनि कारबाही गर्छौं। प्रदेशका मन्त्रीले त्यस्तो गर्नुभयो भने प्रदेशका मन्त्रीलाई नै थुन्छौं, चिन्ता लिनुपर्दैन। काम गर्नुपर्‍यो, काम गराउनुपर्‍यो।’

अनुगमनका क्रममा विभिन्न जिल्लामा पुगिरहेका मन्त्री लम्सालले पटक–पटक स्थानीय नागरिकसँग धम्कीपूर्ण र थर्काउने शैलीमा प्रस्तुत हुने गरेको आरोप लाग्दै आएको छ। कुनै बेला कानुनी शासनको चर्को वकालत गर्ने उनी अहिले भने आफैंलाई कानुनभन्दा माथि रहेको जस्तो व्यवहार गर्ने गरेको भन्दै आलोचना भइरहेको छ।

कानुनी राज्यमा गल्ती वा अपराधको निर्धारण कानुनले गर्छ। तर मन्त्री लम्साल भने आफ्नै नागरिकलाई अपराधीसरह व्यवहार गर्ने शैलीमा प्रस्तुत हुने गरेको देखिन्छ। यसले एकातिर नागरिकमा डर र त्रासको वातावरण सिर्जना गर्छ भने अर्कोतिर कानुनी शासनको मर्ममाथि नै प्रश्न उठाउने काम गर्छ।