काठमाडौं। अपदस्थ पूर्वप्रधानमन्त्री शेख हसिनाले भारतको नयाँदिल्लीबाट मिडियासँग प्रत्यक्ष संवाद गरेको विषयलाई लिएर बङ्गलादेश सरकारले भारतप्रति असन्तुष्टि जनाएको छ।

बङ्गलादेशको विदेश मन्त्रालयले बुधबार विज्ञप्ति जारी गर्दै हसिनालाई भारतमा सार्वजनिक कार्यक्रममा सहभागी हुन र सञ्चारमाध्यमसँग संवाद गर्न दिइएकोप्रति गहिरो आपत्ति जनाएको हो।

मन्त्रालयले भारत सरकारले हसिनालाई सार्वजनिक रूपमा आफ्नो धारणा राख्ने अवसर दिँदा त्यसबाट दुई देशबीचको सम्बन्धमा पर्न सक्ने असरबारे पर्याप्त ध्यान नदिएको आरोप लगाएको छ।

बङ्गलादेशमा जुलाई आन्दोलनको दोस्रो वार्षिकोत्सव मनाइरहेका बेला भारतीय भूमिबाट हसिनाले सार्वजनिक रूपमा आफ्नो धारणा राख्नु बङ्गलादेशको सार्वभौमसत्ताप्रति अनादरपूर्ण कदम भएको मन्त्रालयको भनाइ छ। साथै, आन्दोलनका क्रममा ज्यान गुमाएकाहरूको सम्मानमा समेत यसले चोट पुर्‍याएको बङ्गलादेशले जनाएको छ।

बङ्गलादेशको विदेश मन्त्रालयले सन् २०२४ को जुलाई–अगस्टमा भएका राजनीतिक घटनाक्रमसँग सम्बन्धित गम्भीर आरोप हसिनामाथि रहेको उल्लेख गरेको छ।

हसिनालाई सार्वजनिक रूपमा आफ्नो पक्ष राख्ने अवसर उपलब्ध गराउँदा ती घटनाको इतिहासलाई आफ्नो अनुकूल ढंगले प्रस्तुत गर्ने प्रयासलाई बल पुग्न सक्ने मन्त्रालयको दाबी छ।

बङ्गलादेश सरकारले देशमा कुनै पनि स्वरूपको अधिनायकवाद पुनःस्थापित हुन नदिने प्रतिबद्धता दोहोर्‍याएको छ। साथै, हसिना र उनको राजनीतिक समूहलाई आगामी बङ्गलादेशी राजनीतिमा स्थान नदिइने पनि विज्ञप्तिमा उल्लेख गरिएको छ।

आपत्ति जनाए पनि बङ्गलादेश सरकारले भारतसँगको सम्बन्धलाई थप तनावपूर्ण बनाउन नचाहेको संकेत दिएको छ।

विदेश मन्त्रालयले सार्वभौम समानता, आपसी सम्मान, एकअर्काको आन्तरिक मामिलामा हस्तक्षेप नगर्ने सिद्धान्त र राष्ट्रिय मर्यादाका आधारमा भारतसँग रचनात्मक तथा पारस्परिक हितमा आधारित सम्बन्ध कायम राख्न बङ्गलादेश इच्छुक रहेको जनाएको छ।

तर हसिनालाई भारतमा सार्वजनिक गतिविधि गर्न दिइनुले दुई देशबीचको सम्बन्धमा नकारात्मक प्रभाव पर्न सक्ने चेतावनी पनि बङ्गलादेशले दिएको छ।

बङ्गलादेशले शेख हसिनालाई स्वदेश फिर्ता पठाउन भारतसँग यसअघि पनि पटक–पटक आग्रह गर्दै आएको जनाएको छ।

विदेश मन्त्रालयका अनुसार सन् २०१३ मा बङ्गलादेश र भारतबीच भएको प्रत्यर्पण सन्धिलाई आधार बनाएर हसिनालाई बङ्गलादेश फिर्ता पठाउन अनुरोध गरिएको थियो। तर भारतबाट हालसम्म यस विषयमा औपचारिक प्रतिक्रिया नआएको मन्त्रालयको भनाइ छ।

यही पृष्ठभूमिमा हसिनाले भारतको राजधानीबाट सार्वजनिक रूपमा मिडियासँग संवाद गर्नुले बङ्गलादेशमा थप असन्तुष्टि सिर्जना गरेको देखिन्छ।

यसअघि पूर्वप्रधानमन्त्री हसिनाले नयाँदिल्लीबाट भर्चुअल पत्रकार सम्मेलनमार्फत आफू आगामी डिसेम्बरमा बङ्गलादेश फर्कने घोषणा गरेकी थिइन्।

उनले स्वदेश फर्किएपछि गिरफ्तारी, जेल वा अन्य कुनै कानुनी परिणाम सामना गर्न आफू तयार रहेको बताएकी थिइन्।

आफ्ना समर्थक र देशवासी कठिन परिस्थितिबाट गुज्रिरहेका बेला आफू विदेशमा लामो समय बसिरहन नसक्ने उनको भनाइ थियो।

त्यसैले आफू स्वदेश फर्कने प्रतिबद्धतामा कायम रहेको उनले बताएकी थिइन्।