काठमाडौं। नेपाल आयल निगमले काठमाडौं उपत्यकामा खाना पकाउने एलपी ग्यासको आपूर्ति सहज बनाउन आज विभिन्न पाँच स्थानबाट ग्यास सिलिन्डर बिक्रीवितरण गर्ने भएको छ।

ग्यासको आवश्यकता भएका उपभोक्तालाई लक्षित गरी निगम र जिल्ला प्रशासन कार्यालय काठमाडौंको समन्वयमा विभिन्न ब्रान्डका सिलिन्डर उपलब्ध गराउन लागिएको हो।

निगमले सार्वजनिक गरेको सूचनाअनुसार उपभोक्ताले तोकिएका पाँच स्थानबाट आफूलाई आवश्यक पर्ने ग्यास खरिद गर्न सक्नेछन्। बिक्री केन्द्रमा विभिन्न कम्पनीका ग्यास उपलब्ध हुने भएकाले उपभोक्तालाई आफूले प्रयोग गर्दै आएको ब्रान्डअनुसार सिलिन्डर लिन सहज हुने जनाइएको छ।

टेकुस्थित नेपाल आयल निगम परिसरबाट नेपाल, एचपी, एभरेस्ट/सुगम, श्रीराम, सगर, सिद्धार्थ, श्री र हिमाल ग्यास बिक्री गरिनेछ।

त्यस्तै, चाबहिलस्थित यातायात कार्यालय परिसरबाट नेपाल र एचपी ग्यास वितरण गरिने निगमले जनाएको छ।

राधास्वामी कीर्तिपुर परिसरबाट नेपाल, एचपी, एभरेस्ट/सुगम, श्रीमाया, श्रीकृष्ण, साइबाबा र ओम ग्यास बिक्रीका लागि राखिनेछ। कीर्तिपुर क्षेत्रका उपभोक्तालाई लक्षित गरी उक्त स्थानबाट विभिन्न ब्रान्डका सिलिन्डर उपलब्ध गराउने व्यवस्था गरिएको हो।

यसैगरी, राधास्वामी वसुन्धरा परिसरबाट नेपाल, एचपी, एभरेस्ट/सुगम, भानु र ओम ग्यास बिक्री गरिनेछ। वसुन्धरा तथा आसपासका क्षेत्रमा ग्यास आवश्यक भएका उपभोक्ताले उक्त केन्द्रबाट सिलिन्डर खरिद गर्न सक्नेछन्।

पुरानो जिल्ला प्रशासन कार्यालय, बबरमहलबाट भने नेपाल, एचपी, एभरेस्ट/सुगम, श्रीराम, सगर, हिमाल, एसटीसी, लोकप्रिय र सूर्य ग्यास बिक्रीवितरण गरिने निगमले जनाएको छ।

निगमले ग्यास वितरणलाई व्यवस्थित बनाउन अति आवश्यक भएका उपभोक्तालाई मात्र तोकिएका बिक्री केन्द्रमा उपस्थित भएर ग्यास खरिद गर्न आग्रह गरेको छ। ग्यास खरिद गर्न जाने उपभोक्ताले आफ्नो नागरिकता प्रमाणपत्र वा राष्ट्रिय परिचयपत्र अनिवार्य रूपमा साथमा लैजानुपर्नेछ।

ग्यास बिक्रीका लागि बिहान १० बजेदेखि साँझ ६ बजेसम्मको समय तोकिएको छ। तोकिएको समयभित्र सम्बन्धित बिक्री केन्द्रमा पुगेर आवश्यक प्रक्रिया पूरा गरेपछि उपभोक्ताले ग्यास खरिद गर्न सक्नेछन्।

निगमले पछिल्लो समय ग्यासको माग र वितरणलाई लिएर देखिएको चापलाई ध्यानमा राख्दै विशेष व्यवस्थामार्फत बिक्री गर्न लागेको जनाएको छ। यद्यपि, एलपी ग्यासको आयातमा कुनै ठूलो अवरोध नरहेको र आयात नियमित रूपमा भइरहेको निगमको भनाइ छ।

निगमका अनुसार सम्बन्धित ग्यास उद्योगहरूले पनि आफ्ना आधिकारिक विक्रेतामार्फत नियमित रूपमा ग्यासको बिक्रीवितरण गरिरहेका छन्। त्यसैले उपभोक्तालाई अनावश्यक रूपमा ग्यास सञ्चय नगर्न र अत्यावश्यक परेमा मात्र तोकिएका केन्द्रमा पुगेर सिलिन्डर खरिद गर्न आग्रह गरिएको छ।

विशेष बिक्री केन्द्रबाट ग्यास वितरणको व्यवस्था उपभोक्तालाई तत्काल राहत दिन तथा बजारमा ग्यासको उपलब्धता सहज बनाउन गरिएको निगमले जनाएको छ।

निगमले नियमित आपूर्ति र वितरण प्रणालीलाई निरन्तरता दिइरहेको भन्दै उपभोक्तालाई आत्तिनुपर्ने अवस्था नरहेको पनि स्पष्ट पारेको छ।