काठमाडौं। प्रतिनिधिसभाको सोमबारको बैठकमा राष्ट्रिय स्वतन्त्र पार्टी (रास्वपा) का सांसद सुलभ खरेलले पार्टीको गतिविधिबारे बोल्न थालेपछि सभामुख डोलप्रसाद अर्यालले उनलाई रोकेका छन्।

आकस्मिक समयमा बोल्ने क्रममा सांसद खरेलले रास्वपाले १ भदौदेखि ‘क्यान्डिडेट क्लब’ सुरु गर्न लागेको जानकारी गराउँदै पार्टीलाई धन्यवाद दिएका थिए।

उनले स्थानीय तह र प्रदेशसभा निर्वाचनका लागि योग्य, विज्ञ तथा ऊर्जाशील युवालाई उम्मेदवार छनोट प्रक्रियामा सहभागी गराउने उद्देश्यले कार्यक्रम अघि बढाइएको बताएका थिए।

खरेलले भने, ‘राष्ट्रिय स्वतन्त्र पार्टीले क्यान्डिडेट क्लब खुलाउँदै छ। देशभरबाट योग्य, विज्ञ र ऊर्जाशील युवालाई आगामी स्थानीय तह र प्रदेश निर्वाचनमा उम्मेदवार छनोट तथा मनोनयन प्रक्रियामा सहभागी गराउने उद्देश्यले यो अभियान सुरु हुँदैछ।’

उनले आफ्नो भनाइलाई थप विस्तार गर्न खोजिरहेका बेला सभामुख अर्यालले हस्तक्षेप गरे। आकस्मिक समयमा उठाइएको विषय तत्कालीन वा आकस्मिक प्रकृतिको हुनुपर्ने भन्दै सभामुखले खरेललाई आफ्नो भनाइ रोक्न आग्रह गरे।

सभामुख अर्यालले भने, ‘माननीय सदस्यले आकस्मिक समय माग्नुभएको थियो। माननीय सदस्यको यो विषय कहीँ पनि आकस्मिक देखिँदैन। त्यसकारण बसौँ माननीय सदस्य, बसौँ।’

सभामुखको निर्देशनपछि सांसद खरेल आफ्नो भनाइ रोक्न बाध्य भए। त्यसक्रममा विपक्षी दलका केही सांसदले टेबल ठोकेर प्रतिक्रिया जनाएका थिए।