काठमाडौं। नुवाकोटमा आएको भीषण बाढीले राष्ट्रिय प्रजातन्त्र पार्टी (राप्रपा) नुवाकोटका अध्यक्ष कुलबहादुर खड्गीको चारतले पक्की घर बगाएको छ ।

बाढी आउनुअघि परिवारसहित भागेर उनीहरूले ज्यान जोगाएका छन् ।

विदुर नगरपालिका–१, पुरानो पुलनजिक रहेको खड्गीको घर बिहान करिब ९ बजे आएको बाढीले बगाएको हो । बाढीले घरसँगै आसपासको बस्तीमा समेत ठूलो क्षति पुर्‍याएको छ ।

खड्गीका अनुसार उनीसहित करिब ४० जना स्थानीय बजारभन्दा करिब २ सय मिटरमाथिको डाँडामा पुगेर उद्धारको पर्खाइमा छन् ।

उनले बाढीबारे सूचना ढिला आएकाले समयमै सुरक्षित हुन नसकेको बताए । उनका अनुसार यसअघि केही घण्टा अगावै सूचना आउने गरे पनि बुधबार करिब आधा घण्टा अगाडि मात्रै जानकारी आएको थियो ।

स्थानीय पत्रकारबाट बिहान साढे ८ बजेतिर फोन आएपछि हतारहतार गाडी मगाएर परिवारसहित भागेको उनले बताए । घरबाट लगाएको कपडा र केही नगदबाहेक अन्य सामान निकाल्न नपाएको खड्गीको भनाइ छ ।

उनका अनुसार पुल क्षेत्रमा बाढी एक्कासि पसेको थियो । केहीबेरमै चारतले घरसमेत बगाएपछि आफूहरू घरबारविहीन भएको उनले बताए ।

बाढीका कारण डाँडातर्फ जाने बाटोसमेत सहज नभएको र बस्तीभन्दा करिब १ सय मिटर माथिसम्म लेदो पानी पुगेको खड्गीले बताएका छन् ।

नदीमा फेरि ठूलो बाढी आउन सक्ने खबरले स्थानीय थप त्रसित बनेका छन्।