काठमाडौं । रसुवा र आसपासका क्षेत्रमा गत बुधबार आएको विनाशकारी बाढीले ठूलो जनधनको क्षति गरेपछि उद्धार तथा खोजी कार्यलाई तीव्र पारिएको छ। बाढीबाट प्रभावित परिवारको उद्धार, राहत वितरण र बेपत्ताको खोजीका लागि स्वदेशी सुरक्षाकर्मीसँगै अन्तर्राष्ट्रिय विज्ञ टोली पनि परिचालन हुन थालेका छन्।

यसैक्रममा संयुक्त राज्य अमेरिकाको ‘क्राइसिस रेस्पोन्स इन्टरनेसनल’बाट १३ सदस्यीय विज्ञ टोली नेपाल आइपुगेको छ। टोलीले रसुवाको स्याफ्रुबेँसीस्थित चिलिमे जलविद्युत् आयोजनाको सुरुङमा केन्द्रित भएर खोजी तथा उद्धार अभियान सञ्चालन गर्ने तयारी गरेको छ।

बाढीपछि सुरुङभित्र केही मानिस अझै जीवित रहेको हुन सक्ने आशा गरिएको छ। यही सम्भावनालाई ध्यानमा राखेर अमेरिकी टोलीले विशेष उपकरणसहित उद्धार योजना अघि बढाएको हो।

टोलीका सदस्य फेरिन कोलका अनुसार सुरुङ क्षेत्रमा पुगेर मानिसको आवाज वा गतिविधि पत्ता लगाउन अत्याधुनिक ध्वनि सुन्ने उपकरण प्रयोग गरिनेछ। उपकरणबाट सुरुङभित्र रहेका व्यक्तिको सम्भावित आवाज तथा स्पन्दन पहिचान गरेपछि उद्धारकर्मीलाई भित्र प्रवेश गराउने योजना रहेको उनले बताए।

कोलले विपद्को कठिन परिस्थितिमा पनि नेपाली नागरिकले देखाएको धैर्य र साहसको प्रशंसा गरेका छन्। आफ्ना प्रियजन गुमाएका परिवारको अवस्था अत्यन्तै पीडादायी रहेको उल्लेख गर्दै उनले उद्धार अभियानमा सहभागी हुन पाउनु आफ्नो टोलीका लागि महत्वपूर्ण अवसर भएको बताए।

उनका अनुसार टोलीको प्रारम्भिक योजना हेलिकोप्टरमार्फत जलविद्युत् आयोजनाको सुरुङ क्षेत्रसम्म पुगेर अवस्थाको निरीक्षण गर्ने रहेको छ।

यता अर्का उद्धारकर्मी डेरिक स्पेन्सरले सुरुङभित्र प्रवेश गर्नु निकै जोखिमपूर्ण रहेको बताएका छन्। टोली सुरुङको प्रवेशद्वारसम्म पुगे पनि भित्रको अवस्था चुनौतीपूर्ण देखिएपछि थप सुरक्षा उपाय अपनाउनुपर्ने अवस्था आएको उनको भनाइ छ।

सुरुङभित्र प्रवेशका लागि डोरीलगायत विशेष सुरक्षा उपकरणको प्रयोग गर्ने तयारी गरिएको छ। उद्धार अभियानलाई सुरक्षित र प्रभावकारी बनाउन थप जनशक्ति तथा विभिन्न निकायबीच समन्वय आवश्यक रहेको स्पेन्सरले बताए।

उनका अनुसार अमेरिकी विज्ञ टोलीले स्थानीय बासिन्दा र सशस्त्र प्रहरीसँग सहकार्य गर्दै खोजी तथा उद्धार अभियान अघि बढाइरहेको छ। बाढीमा बेपत्ता भएकाहरूको सकुशल उद्धार हुने आशामा अहिले रसुवाको सुरुङ क्षेत्रमा उद्धारकर्मीको ध्यान केन्द्रित भएको छ।