काठमाडौं । अमेरिकी राष्ट्रपति डोनाल्ड ट्रम्पले इरानसँग वार्ता वा सम्झौता गर्न आफूले कुनै पहल नगरेको बताएका छन्। उनले आफ्नो प्रशासनले तेहरानलाई वार्ताको टेबलमा ल्याउन दबाब दिइरहेको भन्ने समाचारलाई अस्वीकार गरेका छन्।

ट्रम्पले मंगलबार राति सामाजिक सञ्जाल ‘ट्रुथ सोसल’मार्फत एबीसी न्युजमा प्रकाशित रिपोर्टको खण्डन गर्दै त्यसलाई ‘फेक न्युज’ भनेका हुन्। इरानसँग सम्झौता गर्ने आफ्नो कुनै इच्छा नरहेको उनको भनाइ छ।

ट्रम्पले अहिलेको परिस्थितिप्रति आफू सन्तुष्ट रहेको उल्लेख गर्दै होर्मुज जलडमरूमध्यमा अमेरिकी नियन्त्रण बलियो रहेको र इरानको अर्थतन्त्र कमजोर बन्दै गएको दाबी गरेका छन्।

उनले इरानले आफूहरूले रोक्न नसक्ने प्रक्रियालाई केही समय लम्ब्याउने प्रयास मात्र गरिरहेको आरोपसमेत लगाए। साथै, इरानी जनताले आफ्नो अधिकारका लागि कहिले आवाज उठाउने हुन् भन्दै उनले प्रश्न गरेका छन्।

ट्रम्पको यो अभिव्यक्ति आउनुअघि अमेरिकी सेनाले होर्मुज जलमार्ग आसपास इरानी क्षेत्रमा गरेको पछिल्लो आक्रमणको उनले बचाउ गरेका थिए। इरानले त्यसको जवाफ दिए अमेरिकाले अझ कडा कारबाही गर्ने चेतावनीसमेत उनले दिएका थिए।

यता, इरानले भने अमेरिकी सेनाले सर्वसाधारणमाथि आक्रमण गरेको आरोप लगाएको छ। इरानी अधिकारीहरूका अनुसार विवाह समारोह भइरहेको स्थानलाई अमेरिकी सेनाले निशाना बनाउँदा पाँच जनाको मृत्यु भएको र ६० भन्दा बढी मानिस घाइते भएका छन्।