काठमाडौं । चलचित्र विकास बोर्डको अध्यक्ष पद खाली भएको पाँच दिनमै सरकारले कार्यवाहकको टुंगो लगाएको छ।

सञ्चार तथा सूचना प्रविधि मन्त्रालयका सहसचिव रविलाल शर्मालाई बोर्डको कार्यवाहक अध्यक्षको जिम्मेवारी दिइएको हो।

तत्कालीन अध्यक्ष दिनेशराज दाहाल ‘दिनेश डिसी’ले ११ भदौमा दुई वर्षे कार्यकाल पूरा गरेर बिदा लिएपछि बोर्ड नेतृत्वविहीन थियो। नयाँ अध्यक्ष नियुक्त नभएसम्मका लागि मन्त्रालयले शर्मालाई कार्यवाहकको जिम्मेवारी दिएको हो।

शर्माले बुधबार नै बोर्डमा पुगेर पदभार सम्हालेका छन्। उनको जिम्मेवारी भने नयाँ अध्यक्ष नआउन्जेल बोर्डको दैनिक प्रशासनदेखि अत्यावश्यक निर्णयसम्मलाई ‘ब्रेक’ लाग्न नदिनु हुनेछ।

अध्यक्ष पदका लागि नयाँ व्यक्ति आउने बाटो खुला राख्दै मन्त्रालयले सहसचिव शर्मालाई बोर्डको नेतृत्व सुम्पिएको हो।