काठमाडौं। उज्यालो नेपाल पार्टीका अध्यक्ष कुलमान घिसिङले प्रधानमन्त्री बालेन शाहसँग भेटवार्ता गरेका छन्। सिंहदरबारस्थित प्रधानमन्त्री निवासमा बिहीबार भएको भेटमा घिसिङले बाढी प्रभावित क्षेत्रको स्थलगत निरीक्षणका क्रममा देखिएका समस्या र सरकारले तत्काल गर्नुपर्ने कामबारे सुझाव दिएका हुन्।

घिसिङ नेतृत्वको टोलीले बाढी प्रभावित विभिन्न क्षेत्रमा पुगेर उद्धार, राहत तथा पुनर्स्थापनाको अवस्थाबारे जानकारी लिएको थियो। सोही क्रममा प्राप्त विवरण र अनुभव प्रधानमन्त्रीसमक्ष प्रस्तुत गरिएको घिसिङले बताए।

‘विपद्को अवस्थामा हामीले फिल्डमा भिजिट गरेर धेरै ठाउँमा देखेका, बुझेका र गर्नुपर्ने विषयमा उहाँहरूलाई दिने सुझावका लागि भेटघाट गरेका हौं,’ संचारकर्मीसँगको कुराकानीमा घिसिङले भने। 

प्रधानमन्त्री कार्यालयबाट बाहिरिने क्रममा उनले विपद्को अवस्थामा फिल्डमा देखिएका विषयका आधारमा सरकारलाई लिखित तथा मौखिक रूपमा सुझाव दिएको जानकारी दिए।

उनका अनुसार विशेषगरी उद्धार, राहत र विस्थापितको पुनर्स्थापनाका विषयमा सरकारलाई समग्र सुझाव दिइएको छ।

भेटका क्रममा प्रधानमन्त्री शाहले जलविद्युत् आयोजनाका सुरुङभित्र फसेका नागरिकको उद्धारबारे पनि चासो राखेका थिए। सुरुङमा फसेकाहरूलाई सुरक्षित रूपमा बाहिर निकाल्न अपनाउनुपर्ने उपायबारे घिसिङको टोलीले आफूले बुझेका विषय प्रधानमन्त्रीसमक्ष राखेको थियो।

‘मुख्य गरेर सुरुङभित्र थुनिएका साथीहरूलाई कसरी उद्धार गर्ने भन्नेबारे उहाँहरूको जिज्ञासा थियो,’ उनले भने, ‘त्यससम्बन्धमा हामीले बुझेका र गर्नुपर्ने कुराहरू राखेका छौं ।’

घिसिङका अनुसार प्रधानमन्त्री शाहले सुरुङभित्र फसेका नागरिकको उद्धारलाई प्राथमिकतामा राख्दै आवश्यक सबै स्रोतसाधन परिचालन गरेर भए पनि उद्धार अघि बढाउने प्रतिबद्धता जनाएका छन्।

घिसिङले प्रधानमन्त्रीले जुनसुकै अवस्थामा पनि आवश्यक जनशक्ति र स्रोतसाधन परिचालन गरी उद्धार कार्य अघि बढाउने बताएको जानकारी दिए।