रसुवा । भोटेकोशीमा आएको विनाशकारी बाढीपछि त्रिशूली-३ ‘ए’ जलविद्युत् आयोजनाको सुरुङमा १० दिनदेखि फसेका सञ्जय साह र मेकानिकल सुपरभाइजर कबिर महर्जनको शुक्रबार जीवितै उद्धार भएको छ।

उद्धारपछि साहले सुरुङभित्र अझै मानिसहरू हुन सक्ने बताएका छन्। उनका अनुसार आफू सेन्टर रुममा अपरेटरका रूपमा कार्यरत थिए। सामान्य अवस्थामा त्यहाँ चार-पाँच जना रहने भए पनि बाढी आउँदा करिब ४०-५० जना रहेको उनको भनाइ छ।

बाढी आउनुअघि दुर्घटना हुन लागेको थाहा पाएपछि आफूले सहकर्मीहरूलाई भाग्न जानकारी गराएको साहले बताए। सबैलाई सुरक्षित बाहिर पठाउने क्रममा आफ्नो समय बितेकाले आफू भने सुरुङबाट निस्कन नसकेको उनको भनाइ छ।

‘त्यत्रो दुर्घटना भएपछि म एक्लै भागेर भएन। सबैलाई बचाउनुपर्‍यो। त्यसक्रममा सबैलाई बाहिर भाग्न भनेँ, तर मेरो समय गयो र अन्तिममा म निस्कन सकिनँ,’ उनले भने।

साहका अनुसार सुरुङको छेउछाउमा तीन–चार जना साथीहरू थिए। तर भित्रतिर रहेको पावर हाउसमा समेत मानिसहरू हुन सक्ने उनको अनुमान छ।

‘हुनसक्छ होला। सबै भाग्न नसकेको हुनुपर्छ। टनेल लामो छ, पानीको फोर्सले भित्र लगिसकेको हुन सक्छ,’ उनले भने।

सुरुङभित्र १० दिन बिताउँदा आफूले महामन्त्र जप गरेर समय बिताएको समेत साहले बताए।