काठमाडौं । सर्वोच्च अदालतले राजनीतिक विश्लेषक भरतमणि दाहाललाई रिहा गर्न परमादेश जारी गरेको छ।

दाहालको बन्दीप्रत्यक्षीकरण रिटमाथि बिहीबार सुनुवाइ गर्दै न्यायाधीशद्वय कुमार रेग्मी र सुनिलकुमार पोखरेलको संयुक्त इजलासले उनलाई तारेखमा राखेर अनुसन्धान गर्न आदेश दिएको हो।

सर्वोच्चले दाहाललाई थुनामुक्त गरी तारेखमा राखेर अनुसन्धान अघि बढाउन नेपाल प्रहरी प्रधान कार्यालय र साइबर ब्युरो, भोटाहिटीका नाममा परमादेश जारी गरेको छ।

यसअघि सर्वोच्च अदालतले दाहाललाई पक्राउ गर्नुको आधार र कारणसहित लिखित जवाफ पेस गर्न प्रहरीलाई आदेश दिएको थियो।

अदालतले आदेश प्राप्त भएको मितिले बाटोको म्यादबाहेक २४ घण्टाभित्र अनुसन्धानसम्बन्धी मिसिलसहित दाहाललाई अदालतमा उपस्थित गराउन भनेको थियो।

सर्वोच्चको आदेशपछि प्रहरीले दाहाललाई बिहीबार अदालतमा उपस्थित गराएको थियो। त्यसपछि उनको बन्दीप्रत्यक्षीकरण रिटमाथि सुनुवाइ भएको हो।

दाहाललाई प्रहरीले आइतबार मोरङको बेलबारीबाट पक्राउ गरेको थियो।

प्रहरीका अनुसार आफ्नो युट्युब च्यानलमार्फत भूराजनीतिक विषय तथा उच्च राजनीतिक व्यक्तिहरूसँग सम्बन्धित भ्रामक प्रचार गरेको आरोपमा उनलाई पक्राउ गरिएको थियो।

दाहालविरुद्ध साइबरसम्बन्धी कसुरमा अनुसन्धान भइरहेको प्रहरीले जनाएको थियो। सर्वोच्चको पछिल्लो आदेशपछि भने उनलाई थुनामा नराखी तारेखमा राखेर अनुसन्धान अघि बढाइने भएको छ।