काठमाडौं । गत बिहीबारदेखि अवरुद्ध नेपालका सरकारी वेबसाइटहरू क्रमशः सञ्चालनमा आउन थालेका छन् ।

पीएचपीमा देखिएको सुरक्षा कमजोरीका कारण अवरुद्ध भएका वेबसाइटहरू सुरक्षा प्याचिङ, परीक्षण र प्रमाणीकरणको काम पूरा भएसँगै पुनः सञ्चालनमा आउन थालेका हुन् ।

प्रधानमन्त्री तथा मन्त्रिपरिषद्को कार्यालयअन्तर्गतको सफ्टवेयर विकास तथा सञ्चालन केन्द्रका अनुसार हालसम्म एक हजारभन्दा बढी डोमेन पुनः सञ्चालनमा ल्याइएको छ । ती वेबसाइट तथा अनलाइन सेवाहरू सामान्य रूपमा सञ्चालन भइरहेका छन् ।

अर्थ मन्त्रालय, सञ्चार तथा सूचना मन्त्रालय र प्रधानमन्त्री तथा मन्त्रिपरिषद्को कार्यालयका वेबसाइटसहित विभिन्न सरकारी अनलाइन सेवाहरू सञ्चालनमा आइसकेका छन् ।

सञ्चालनमा आउन बाँकी रहेका सेवाहरूलाई पनि पूर्ण रूपमा सुचारु गर्न कर्मचारीहरू तीव्र रूपमा खटिरहेको केन्द्रले जनाएको छ ।