काठमाडौँ, २७ असार : डेविस कपमा सहभागी हुन ४ खेलाडीसहित ६ सदस्यीय नेपाली टेनिस टोली आइतबार मलेसियाको क्वालालम्पुर जाने भएको छ ।

जुलाइ १६ देखि १९ तारिखसम्म हुने प्रतियोगितामा प्रदीप खड्का, प्रणव मानन्धर, निसान श्रेष्ठ र आयुशमान हजुर घलेले नेपालको चुनौती प्रस्तुत गर्ने छन् । प्रशिक्षकमा जितेन्द्र परियार तथा व्यवस्थापकमा जयजीव हाडा रहेका छन् । समूह ४ को यो प्रतिस्पर्धामा नेपालसहित कुवेत, कीर्गिस्तान, मलेसिया, प्यासिफिक ओसिएना, कतार, इराक र फिलिपिन्स गरी आठ राष्ट्र दुई समूहमा बाँडिएर खेल्ने छन् ।

टोलीलाई युवा तथा खेलकुदमन्त्री तेजुलाल चौधरी, राष्ट्रिय खेलकुद परिषद् कार्यकारी समितिका सदस्य कमलबहादुर भट्टराई, नेपाल टेनिस सङ्घ, तदर्थ समितिका संयोजक मनोहरदास मूललगायतले आज यहाँ आयोजित एक कार्यक्रममा सफलताको शुभकामनासहित बिदाइ गर्नुभयो ।