ट्रम्प प्रशासनले पूर्व उपराष्ट्रपति कमला ह्यारिसको गुप्तचर सेवाको सुरक्षा फिर्ता लिएको ह्वाइट हाउसका एक अधिकारीले शुक्रबार बताएका छन्।

सीएनएनका अनुसार तत्कालीन राष्ट्रपति जो बाइडनले डेमोक्र्याटिक पार्टीका तर्फबाट राष्ट्रपति पदका लागि निर्वाचित उम्मेदवार ह्यारिसका लागि अनुमोदन गरेको समयावधि जुलाई २१ मा समाप्त भएको थियो ।

ह्यारिसका एक वरिष्ठ सहयोगीले एएफपीलाई बताएअनुसार ह्यारिस ‘अमेरिकी गुप्तचर सेवाको व्यावसायिकता, समर्पण र सुरक्षाप्रतिको अटूट प्रतिबद्धताका लागि आभारी हुनुहुन्छ।

ह्यारिसले चुनाव हारेदेखि नै उहाँले आफुलाई कम चर्चामा राख्नुभएको छ । उहाँले आफ्नो असफल राष्ट्रपति पदका लागि आफूले लेखेको पुस्तकको प्रचारका लागि यो शरद ऋतुमा भ्रमण गर्नुहुनेछ। यो यात्राले उहाँलाई अक्सर सार्वजनिक रूपमा उपस्थित हुन बाध्य पार्नेछ।

ह्यारिसले ट्रम्पविरुद्ध आफ्नो छोटो राष्ट्रपतीय दौडको अवधिलाई पुस्तकको शीर्षक ‘१०७ दिन’ दिनुभएको छ।साइमन एण्ड शुस्टरद्वारा प्रकाशित संस्मरण सेप्टेम्बर २३ मा संयुक्त राज्य अमेरिकामा सार्वजनिक हुनेछ ।

संयुक्त राज्य अमेरिकाको उपराष्ट्रपतिको रूपमा सेवा गर्ने पहिलो महिला, ह्यारिस डेमोक्र्याटिक उम्मेदवार बन्नुभएको थियो । बाइडेनले आफ्नो संज्ञानात्मक स्वास्थ्यको बारेमा चिन्ताको बीच दौडबाट नाम फिर्ता लिनुभएको थियो ।

ह्यारिसले आफूले पुस्तक ‘स्पस्टवादिता र प्रतिविम्व’का साथ लेखेको र अभियानको ‘पर्दा पछाडिको विवरण’ दिने वाचा गर्नुभएको छ ।

गत जनवरीमा पदभार ग्रहण गरेदेखि नै राष्ट्रपति ट्रम्पले आफ्ना कथित शत्रु र राजनीतिक प्रतिद्वन्द्वीलाई लक्षित गरी विभिन्न कदम चाल्नुभएको छ ।

उहाँले अन्य अधिकारी र पूर्व अधिकारीहरूको सुरक्षा स्वीकृति खोस्नुभएको छ, उहाँविरुद्ध विगतका मुद्दाहरूमा संलग्न कानून फर्महरूलाई लक्षित गर्नुभएको छ र विश्वविद्यालयहरूबाट संघीय अनुदान रोक्का गर्नुभएको छ ।

गत हप्ता एफबीआईका प्रतिनिधिहरूले पूर्व राष्ट्रिय सुरक्षा सल्लाहकार जोन बोल्टनको घर र कार्यालयमा छापा मारेका थिए।