काभ्रेपलाञ्चोक । जेनजी आन्दोलनको मौका छोपेर नख्खु कारागारबाट भागेका एक कैदीले श्रीमतीको हत्या गरेका छन् । काभ्रेको पनौती नगरपालिका–१२ गागलका वर्ष ३५–३६ का सन्तबहादुर तामाङले आफ्नै श्रीमती ३० वर्षीय मनिषा घ्यावा तामाङको हत्या गरेको वडा अध्यक्ष जयराम केसीले जानकारी दिए । सन्तबहादुर जेन्जी आन्दोलनका क्रममा नख्खु कारागारबाट भागेका थिए । उनी जवरजस्ती करणीमा जेल परेका थिए ।

मनीषा तीन दिनदेखि बेपत्ता थिइन् । घर नजिकै बारीमा पुरेको अवस्थामा मनीषाको शव फेला परेको पनौती–१२ का वडाध्यक्ष जयराम केसीले बताए । ‘मनिषा तीन दिनदेखि हराइरहेकी थिइन् । घर नजिकै पुरेको अवस्थामा शव फेला परेको छ । बाहिर चप्पल फेला परेपछि स्थानीयले प्रहरीलाई खबर गरेका थिए’, वडाध्यक्ष केसीले भने । सन्तबहादुर र उनकी श्रीमतीबीच जेलबाट फर्किएपछि झगडा भएको स्थानीयले प्रहरीलाई बताएका छन् । घटनाबारे थप अनुसन्धान गरिरहेको प्रहरीले बताएको छ ।

इलाका प्रहरी कार्यालय बनेपाको टोली घटनास्थलमा पुग्दै गरेको र थप विवरण आउन बाँकी रहेको जिल्ला प्रहरी कार्यालय काभ्रेका प्रहरी उपरीक्षक कोमल शाहले जानकारी दिएका छन् । हत्यापछि तामाङ फरार छन् । प्रहरी घटनास्थल पुगेपछि थप जानकारी हुने प्रहरीले जनाएको छ । जेनजी आन्दोलनका क्रममा देशभरका २७ बढी कारागारबाट हजारौंको संख्यामा कैदीबन्दी भागेका छन् । भागेकामध्ये थोरैलाई मात्र पुनः नियन्त्रणमा लिन सकिएको छ । ठूलो संख्यामा कैदीबन्दी भागेका कारण समाजमा डर–त्रासको वातावरण छाएको छ ।