चितवन । पृथ्वी राजमार्ग अन्तर्गत नौबिसे–मुग्लिन सडक खण्डमा खसेको पहिरो पन्छाइएको छ । तर, राति खसेको पहिरोले रोकिएका सवारी साधनहरुको अहिले अत्यधिक चाप छ । त्यसैले सवारी साधनहरुको लामो लाइन छ ।

गए राति जवाङखोला लगायतका स्थानमा पहिरो खसेपछि राजधानी काठमाडौंको लाइफलाइन मानिने पृथ्वी राजमार्ग ठप्प भएको थियो । तर डोजरहरु प्रयोग गरेर राति नै पहिरो हटाई सकिएको जिल्ला प्रहरी कार्यालय धादिङले जानकारी दिएको छ ।

मुग्लिन–नारायणगढ खण्डको तुइन खोलानेर झरेको पहिरो भने हटाउने क्रम जारी छ । बुधबार साँझ पानी परेकाले पहिरो पन्छाउने काम केहीबेर रोकिएको थियो । आज बिहानैबाट पहिरो पन्छाउने काम थालिएको छ । सबै पहिरो हटाएर बाटो खुलाउन कम्तिमा दुई दिन लाग्न सक्ने अनुमान गरिएको सडक डिभिजन कार्यालय भरतपुरले जनाएको छ ।