वीरगञ्ज । वीरगञ्जमा आयोजित दशैँ मेलामा दुई समूहबीच झडप हुँदा एक युवकको ज्यान गएको छ । मंगलबार राति भएको झडपमा घाइते भएका २० वर्षीय युवकको नारायणी अस्पतालमा उपचारका क्रममा ज्यान गएको प्रहरीले जनाएको छ । उनको नाम खुलिसकेको छैन ।

पर्सा प्रहरीका अनुसार मेलामा पसल राख्ने विषयलाई लिएर भएको विवाद झडपमा परिणत भएको थियो । गीता मन्दिर नजिक मेलाको सुरुवाती दिनमै दुई समूहबीच विवाद सुरु भएको प्रारम्भिक अनुसन्धानमा खुलेको छ । घटनामा संलग्न भएको आशंकामा प्रहरीले तीन जनालाई नियन्त्रणमा लिएको छ ।

जिल्ला प्रहरी कार्यालय पर्साका प्रहरी प्रवक्ता डीएसपी हरिबहादुर बस्नेतका अनुसार विवादको वास्तविक कारण अझै खुलेको छैन । नियन्त्रणमा लिइएकासँग सोधपुछ भइरहेको र घटनाबारे अनुसन्धान सुरु गरिएको उनले बताए । मृतकको शव पोस्टमार्टमका लागि नारायणी अस्पतालमा राखिएको छ ।