सुनसरी । सुनसरीमा एक महिलाको हत्या भएको छ । दशैंमा परिवारमा रमाइलो गर्दै बस्नु पर्ने बेला श्रीमती हत्याको आरोपमा प्रधानाध्यापक पक्राउ परेका छन् ।

सुनसरी जिल्ला प्रहरी कार्यालयका अनुसार जिल्लाको इटहरी उपमहानगरपालिका–२०, खनारस्थित आफ्नै घरमा मंगलबार झगडाका क्रममा प्रधानाध्यापक सुमन दाहालले पत्नी अनिशा भट्टराईको हत्या गरेका हुन् ।

दाहाल खोटाङ जिल्ला ऐसेलुखर्क गाउँपालिका–१, राखाबाङ्देलस्थित रावाथुम प्राथमिक विद्यालयका प्रधानाध्यापक हुन् । उनलाई नियन्त्रणमा लिएर घटनाको अनुसन्धान थालिएको सुनसरी जिल्ला प्रहरी कार्यालयका प्रमुख एसपी केशवकुमार थेबेले जानकारी दिए ।

उनका अनुसार प्रारम्भिक अनुसन्धानबाट श्रीमान–श्रीमतीबीच विवादका क्रममा उक्त घटना भएको देखिएको छ । पतिको कुटाइबाट अनिशाको मृत्यु भएको प्रहरीले जनाएको छ । भट्टराई इटहरीमा बसेर शिक्षक सेवा आयोगको तयारी गरिरहेकी थिइन् ।

प्रहरीका अनुसार पोस्टमार्टमका लागि शव बीपी कोइराला स्वास्थ्य विज्ञान प्रतिष्ठान, धरान पठाइएको छ । घटनाको पृष्ठभूमि र कारण पत्ता लगाउन अनुसन्धान भइरहेको प्रहरीले जनाएको छ ।