युगाण्डाका केही नागरिकहरू बुधबार आफ्नो देशमा जन्मिएका एक व्यक्ति जोहरान ममदानी संयुक्त राज्य अमेरिकाको प्रसिद्ध सहर न्यूयोर्कको मेयर निर्वाचित भएको समाचारले खुसी व्यक्त गरेका छन् ।

केहीले भने कुनै चासो नभएको प्रतिक्रिया दिएका छन् । युगान्डामा भारतीय मूलको परिवारमा जन्मेका ममदानी सात वर्षको उमेरदेखि अमेरिकामा बस्दै आउनुभएको थियो ।

मङ्गलबार भएको चुनावमा ३४ वर्षीय ममदानी अमेरिकाको सबैभन्दा ठूलो शहरको पहिलो मुस्लिम मेयर बन्न सफल हुनुभएको हो ।ममदानीको निर्वाचनपछि युगान्डाको राजधानी कम्पालाको मेकेरेरे विश्वविद्यालयमा केही उत्साह देखिन्थ्यो । ममदानीका बुबा केही वर्षअघिसम्म सोही विश्वविद्यालयमा वरिष्ठ शिक्षाविद् हुनुहुन्थ्यो।

“त्यहाँ जोहरानलाई देख्दा मलाई लाग्छ, म पनि अमेरिका (न्यूयोर्क) लाई बनाउन सक्छु,” मनोविज्ञानका विद्यार्थी २२ वर्षीय एन्थोनी किराबोले भन्नुभयो ।

“यसले मलाई मेरो देशप्रति राम्रो र गर्व महसुस गराउँछ किनकि यसले युगान्डाले केही राम्रा नेताहरू पनि उत्पादन गर्न सक्छ भन्ने देखाउँछ,” उहाँले एएफपीसँग भन्नुभयो ।

धेरैले ममदानी वा युगान्डाका एक शताब्दीभन्दा बढी समयपछि न्यूयोर्कको सबैभन्दा कान्छो मेयर बनेको तथ्यको बारेमा नसुनेको प्रतिक्रिया दिए ।

यद्यपि, केहीले ममदानीको विजयले युगान्डाका आफ्नै नेताहरूलाई पाठ सिकाउनेमा आशा व्यक्त गरेका छन्। उनीहरू जनवरीमा हुने सम्भावना रहेको आफ्नै राष्ट्रपतीय चुनावको तयारीमा रहेका छन् । युगान्डामा ८१ वर्षीय योवेरी मुसेभेनी सातौँ कार्यकालको लागि निर्वाचनमा प्रतिस्पर्धा गर्दै हुनुहुन्छ।

चुनावमा मुसेभेनीविरुद्ध प्रतिस्पर्धा गर्ने ४३ वर्षीय बोबी वाइनले ममदानीलाई ‘हार्दिक बधाई’ पठाउनुभएको छ।

“युगान्डाबाट हामीले तपाइको विजयमा एउटा उत्सव मनाउँछौं र तपाईंको उदाहरणबाट शक्ति लिन्छौँ । हामी यस्तो देश निर्माण गर्न काम गर्छौं जहाँ प्रत्येक नागरिकले साधन र पृष्ठभूमिको पर्वाह नगरी आफ्ना भव्य सपनाहरू साकार गर्न सक्दछन्,” वाइनले एक्समा लेख्नुभएको छ।

कम्पालाको सिटी पार्कमा एएफपीसँग कुरा गर्दै २८ वर्षीय खरिद अधिकारी जोसेफ सेन्डागिरे युगाण्डाले न्यूयोर्कको चुनावबाट ‘उधाहरण’ लिने आशा व्यक्त गर्नुभयोे।

उहाँले भन्नुभयो, “युगान्डाले स्वतन्त्र र निष्पक्ष चुनावको संस्कृतिलाई अँगाल्नु पर्छ। उम्मेदवारहरूलाई हामीले चाहेको जुनसुकै पदका लागि निष्पक्ष रूपमा प्रतिस्पर्धा गर्न अनुमति दिनुपर्छ। उनीहरूलाई समान व्यवहार गर्नुपर्दछ। त्यसपछि दिनको अन्त्यमा, सबैभन्दा राम्रो उम्मेदवारले जित्न सक्छ।“

अन्य युगाण्डालीहरूले ममदानीको गरिब समर्थक नीतिको स्वागत गर्नुभयो।

“मलाई लाग्छ, उहाँले पर्याप्त नभएका (गरीब)हरूको फाइदामा धनीहरूलाई कर लगाउनु धेरै राम्रो नीति हो,” मकरेरेका २३ वर्षीय कानुनका विद्यार्थी ओवेन मुबाल्याले भन्नुभयो ।

उहाँले भन्नुभयो, “यी सबै व्यक्तिहरू त्यस्ता कार्यालयहरूमा बस्न पाउनु धेरै प्रेरणादायक छ। मलाई साँच्चै लाग्छ, त्यहाँ सिक्नको लागि केहि छ।”