तात्कालीन सरकारको रवि–मामलामा प्रतिशोध थियो : रविन्द्र मिश्र
Nepal One HD २५ कार्तिक २०८२ १८:३१
काठमाडौं । राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रविन्द्र मिश्रले आज राष्ट्रिय स्वतन्त्र पार्टी (रास्वपा) का सभापति रवि लामिछानेसँग डेढ घण्टा लामो भेटघाट गरेका छन् ।
सामाजिक सञ्जालमार्फत भेटबारे जानकारी दिँदै मिश्रले भनेका छन्, ‘औपचारिक कार्यक्रममा सम्मानजनक भाषा प्रयोग गरे पनि, अनौपचारिक अवस्थामा मैले नेपालमा ‘तिमी’ भनेर बोलाउने थोरै मान्छेमध्ये रवि पनि पर्छन् ।’
चार वर्ष अगाडिको भेटको एक तस्वीर पोस्ट गर्दै मिश्रले उनी र रवि बाल्यकालमा लगभग एउटै टोलमा हुर्किएका साथी भएको बताएका छन् । ‘रविको दाइ हरिशरण पनि मेरो तिमी–तिमीको साथी हो’, मिश्रले लेखेका छन् । भेटका क्रममा राजनीतिक विषयमा खुलेर छलफल भएको र दुवैबीच पारस्परिक स्नेह झल्किएको मिश्रले जनाएका छन् । उनका अनुसार, भेट अंकमालसँगै शुरू भई अंकमालमै टुंगिएको थियो ।
राजनीतिकरूपमा कहिलेकाहीँ मतभेद र घोचपेच हुने गरे पनि रवि लामिछानेप्रति आफूले सदैव मानवीय सद्भाव राखेको मिश्रको भनाइ छ । उनले लामिछानेविरुद्ध तात्कालीन सरकारले देखाएको व्यवहारलाई ‘पूर्णतः प्रतिशोधबाट प्रेरित’ भएको टिप्पणी गरेका छन् ।
मिश्रले थप लेखेका छन्, ‘बर्तमान सरकारले प्रतिशोध साँध्ने छैन भन्नेमा म पूर्ण रूपले विश्वस्त छु ।’ रवि लामिछानेसँगको भेटपछि मिश्रले उनको उर्जा, आत्मविश्वास र दृढता देखेर खुशी लागेको बताएका छन् । रविको भनाइ उद्धृत गर्दै उनले लेखेका छन्, ‘म यिनीहरूसँग लड्ने नै हो, दाइ। म त यहाँ आनन्दमा छु । पीडामा त यिनीहरू छन् नि !’ मिश्रले अन्त्यमा लेखेका छन्, ‘हाम्रो राजनीतिक बाटो फरक होला, तर मेरो धेरै धेरै शुभकामना छ, रवि, तिमीलाई ।’
आज रवि लामिछानेलाई भेटेपछि!
औपचारिक कार्यक्रममा सम्मानजनक भाषा प्रयोग गरे पनि, अनौपचारिक अवस्थामा मैले नेपालमा 'तिमी' भनेर सम्वोधन गर्ने थोरै मान्छेमा रवी पनि पर्छन्।
सामान्यतया म २०/२२ वर्षका युवालाई पनि 'जी' ले सम्वोधन गर्छु र 'तपाईँ' भन्छु। मलाई पनि त्यसै गर्न अनुरोध गर्छु।… pic.twitter.com/uFtkwN2geE
— Rabindra Mishra (@RabindraMishra) November 11, 2025
