गण्डकी, २५ कात्तिक : कास्की प्रहरीले जेनजी आन्दोलनमा लुटपाट, तोडफोड तथा आगजनी गर्ने पाँच जनालाई पक्राउ गरेको छ । गत भदौ २४ गते जेनजी आन्दोलनको क्रममा कास्की जिल्लास्थित विभिन्न सरकारी तथा गैरसरकारी कार्यालय, व्यक्तिगत घर पसलमा समेत आगजनी, तोडफोड तथा लुटपाट गर्ने व्यक्तिहरूको पहिचान तथा अनुसन्धानका क्रममा जिल्ला प्रहरी कार्यालय कास्कीबाट खटिएको प्रहरी टोलीले खोजतलास तथा अनुसन्धानको क्रममा थप पाँच जना पक्राउ गरेको कास्की प्रहरीका प्रवक्ता प्रनाउ हरिबहादुर बस्नेतले जानकारी दिनुुभयो ।

पक्राउ पर्नेमा पोखरा महनगरपालिका–१० बुद्धचोक बस्ने ५० वर्षीय चन्द्रबहादुर थापा र ४८ वर्षीय खलि भनेर चिनिने हरिबहादुर थापा, पोखरा २६ बूढीबजार बस्ने ४० वर्षीय रमेश थापा, पोखरा ९ बस्ने ३५ वर्षीय अभिमन्यु पाण्डे र माछापुच्छ्रे« गाउँपालिका ३ बस्ने २५ वर्षीय सन्तोष परियार रहेको प्रहरीले जनाएको छ ।

निजहरूलाई कास्की जिल्ला अदालतबाट आपराधिक उपद्रव गर्न नहुनेसम्बन्धी कसुरमा म्याद थप गरी अनुसन्धान प्रक्रिया अगाडि बढाइएको प्रवक्ता बस्नेतले जानकारी दिनुुभयो ।