काठमाडौं । नेकपा (एमाले) का अध्यक्ष तथा निवर्तमान प्रधानमन्त्री केपी शर्मा ओलीले प्रतिनिधिसभा विघटनविरुद्ध आफ्नो पार्टी अदालत जाने घोषणा गरेका छन् । आज (मंगलबार) च्यासलस्थित पार्टी मुख्यालयमा आयोजित विघटित प्रतिनिधिसभाका सांसदहरूको बैठकमा बोल्दै उनले प्रतिनिधिसभा पुनर्स्थापनाको मागसहित कानुनी लडाइँ सुरु गर्ने बताएका छन् ।

ओलीले प्रतिनिधिसभा विघटन संविधान तथा कानुनविपरीत भएकाले अदालतबाट पुनस्र्थापना बाहेक अन्य निर्णय आउने कुनै ‘संवैधानिक बाटो’ नभएको टिप्पणी गरेका छन् । ओलीले भने, ‘हामी दुईवटा कदम चाल्दै अघि बढ्नेछौँ– पहिलो, यस निर्णयलाई अस्वीकार गर्दै कानुनी उपचार खोज्छौं । दोस्रो, यसको संवैधानिक परीक्षण अनिवार्य छ भन्ने हाम्रो ठहर छ । प्रतिनिधिसभा पुनर्स्थापना बाहेक अन्य फैसला सम्भव छैन ।’

उनीले पटक–पटक संविधान अध्ययन गरेको उल्लेख गर्दै विघटन पूर्ण रूपमा असंवैधानिक र लोकतान्त्रिक मूल्य विपरीत रहेको दोहोर्‍याए । ‘वर्तमान सरकारले आफूलाई लोकतान्त्रिक वा संवैधानिक ठहर्याउन सक्दैन,’ ओलीले दाबी गरे । बैठकमा उनले सरकारप्रति कडा आक्रोश समेत व्यक्त गर्दै भने, ‘अराजकता, आगलागि, तोडफोड र लुटपाटलाई क्रान्ति भन्ने सरकारले संविधान र शान्तिपूर्ण राजनीतिक प्रणालीको मर्म नै कमजोर पारिरहेको छ ।’ ओलीले प्रतिनिधिसभा विघटनविरुद्ध आफ्नो पार्टीले सडक र अदालत दुवै मोर्चामा संघर्ष अघि बढाउने बताएका छन् ।

‘यो सरकार क्रान्तिबाट होइन–आगजनी, लुटपाट र तोडफोडबाट आएको हो’
अध्यक्ष ओलीले भदौ २३ र २४ गतेको घटना डिप स्टेटको योजनाबद्ध हमला भन्दै अहिलेको सरकार त्यहि षडयन्त्रबाट आएको आरोप लगाएका छन् । ओलीले अन्तरिम सरकार जनक्रान्तिबाट नभई आगजनी, तोडफोड र लुटपाटबाट आएको दावी समेत गरेका छन् । विघटित प्रतिनिधि सभाका एमाले सांसदहरुको बैठकलाई सम्बोधन गर्दै ओलीले रियल जेनजीहरु त्यसदिन माइतीघरदेखि एभरेष्ट होटलसम्म आएर फर्किएको बताए । उनले फेक जेनजीहरुले भदौ २४ को विध्वंशको योजनाबमोजिम संसद भवनमा आगो लगाउँन खोज्दा प्रहरीले बाध्यात्मक अवस्थामा गोली चलाएको दावी गरे । ओलीले नेपो बेबीका नाममा बाल मनोविज्ञानमा आतंक मच्चाएर थालिएको अभियाने योजनाबद्ध रहेको बताए । उनले प्रधानमन्त्री सुशीला कार्की आफैं जेनजी आन्दोलनमा उत्रिएर बिध्वंशको योजना बनाएको आरोप समेत लगाए।

ओलीले पार्टी उपाध्यक्ष सुरेन्द्र पाण्डेको एउटा अभिव्यक्तिप्रति पनि आपत्ति जनाएका छन् । उनले पाण्डेका अभिव्यक्ति पार्टीविरोधी रहेको समेत बताए । उपाध्यक्ष पाण्डेले भनेका थिए, ‘भदौ २३ गते १९ जना मान्छे मार्ने गरी गोली चलाइयो, त्यो कुरा गलत हो । त्यो जसले गरेको पनि, एमाले सरकारले गरेको पनि सरकार दोषी हुन्छ । धरहरा कसले बनाएको, मैले बनाएको भन्ने, गोली कसले चलायो, त्यो त थाहा छैन, त्यसो भन्न मिल्दैन ।’ उनले त्यो अभिव्यक्तिलाई लक्षित गर्दै पार्टीविरुद्धको हमला भएको बताए ।

ओलीले पाण्डेलाई लक्षित गर्दै भने, ‘अहिले पनि हामीले सुनिरहेका छौँ, कतिपय मान्छेहरू धरहरा मैले बनाएँ भन्ने गोली कसले चलायो भन्ने थाहा पाइन भन्न मिल्छ ? भन्छन्, जिम्मा लिनुपर्छ भनेर बोलिरहेका छन् । यो हाम्रो पार्टीविरुद्धको स्पष्ट हमला हो । हाम्रो लिडरसिपविरुद्धको स्पष्ट हमला हो । जिम्मा लिनुपर्छ रे, जिम्मा लिनुपर्छ भन्या के ?’