काठमाडौं । प्रधानमन्त्री सुशीला कार्की र नेकपा एमालेका नेताहरुबीच बिहीबार बालुवाटारमा भएको छलफल राजनीतिक विवाद घटाउने प्रयास बने पनि नेतृत्वले उठाएका मुख्य प्रश्नमा सरकार स्पष्ट नदेखिएको एमालेले जनाएको छ । प्रधानमन्त्री कार्कीले फागुन २१ गतेका लागि तय प्रतिनिधि सभा चुनाव सफल बनाउन सबै दलको साथ आवश्यक रहेको बताउँदै एमाले नेतृत्वलाई सहयोगको आग्रह गरिन् ।

छलफलमा एमाले महासचिव शंकर पोखरेल, उपमहासचिव प्रदीप ज्ञवाली र नेता महेश बर्तौला सहभागी थिए । उनीहरूले प्रधानमन्त्रीसँग विशेषतः दुई संवेदनशील विषय उठाए–सरकार गठन तथा संसद् विघटनको संवैधानिक परीक्षण र अध्यक्ष केपी शर्मा ओलीमाथि लगाइएको स्थानहदको मुद्दा ।

नेता बर्तौलाका अनुसार एमालेले अहिलेको सरकार गठन प्रक्रिया तथा संसद् विघटनलाई असंवैधानिक ठहर्‍याउँदै उक्त मुद्दाको अन्तिम निर्णय संवैधानिक अदालतले नै गर्नुपर्ने बतायो । ‘दर्जनौं रिट दर्ता भइसकेका छन्, संवैधानिक परीक्षणपछि मात्रै आगामी राजनीतिक मार्गचित्र निर्धारण हुन्छ’, उनले भने ।

एमालेका नेताहरूले निष्पक्ष र निर्भय वातावरण बिना चुनाव सम्भव नहुने चेतावनी पनि दिए । लुटिएका हतियार, भागेका कैदी, सुरक्षामा देखिएको चरम चुनौती तथा शान्ति–सुरक्षाको कमजोर सूचकले मतदातामाथि मनोवैज्ञानिक दबाब पर्ने उनको मूल्याङ्कन थियो । ‘मतदाताले भयरहित तरिकाले मतदानस्थल पुग्न सक्ने वातावरण अझै बनेको छैन’, एमालेले प्रधानमन्त्री समक्ष भन्यो ।

छलफलको केन्द्रबिन्दु बनेको मुद्दा भने निवर्तमान प्रधानमन्त्री समेत रहेका एमाले अध्यक्ष केपी शर्मा ओलीमाथिको स्थानहद आदेश हो । बर्तौलाका अनुसार उनीहरूले प्रधानमन्त्रीसँग सोधेका थिए, ‘यति ठूलो जनमत प्राप्त दलका अध्यक्षलाई स्थानहद किन तोकियो ? मिडिया ट्रायल हुँदै गएको छ, यस्तो अवस्थामा चुनावी वातावरण कसरी बन्न सक्छ ?’

तर प्रधानमन्त्री कार्कीले यस विषयमा कुनै प्रत्यक्ष प्रतिक्रिया नदिएको एमाले नेताहरु बताउँछन् । उनका अनुसार प्रधानमन्त्रीले ‘सरकार चुनाव सहज बनाउन प्रतिबद्ध छ, वातावरण सुधारका लागि प्रयासरत छ’ मात्र भनेकी थिइन् । एमाले नेताहरूले यसलाई ‘राजनीतिक व्यवहार र सरकारी कार्यशैलीबीचको विरोधाभास’ भनेर टिप्पणी गरेका छन् ।

एमालेले प्रधानमन्त्रीलाई आफूहरू चुनावबाट कहिल्यै नभाग्ने, जनमतकै आधारमा अनुमोदन चाहने पार्टी भएको स्पष्ट पारेका छन् । तर ‘दलहरूलाई मात्र अपिल गरेर होइन, विश्वासिलो वातावरण बनाएर’ चुनाव हुनुपर्ने एमाले नेताहरुको जोड थियो । ‘हामीलाई चारैतिरबाट घेराबन्दी गरेर एक्ल्याउने प्रयास भए पनि लोकतन्त्रमा एक्लै उभिन पनि तयार छौँ’, नेता बर्तौलाले भने । तर उनले सरकार चुनावी माहोल बनाउन अग्रसर देखिनु पर्नेमा जोड दिएका छन् ।

बालुवाटारमा भएको यो संवादलाई दुवै पक्षले सम्बन्ध सुधारतर्फको प्रयास मानिरहेका छन् । तर संवैधानिक विवाद, सुरक्षा चुनौती र अध्यक्ष ओलीमाथिको स्थानहद जस्ता प्रमुख विषयमा कुनै ठोस जवाफ नआएको एमालेको ठहर छ । त्यसैले छलफलले राजनीतिक तनाव घटाउने संकेत देखाए पनि, ठोस निचोड निकाल्न भने असफल भएको एमाले नेताहरुको भनाइ छ ।