काठमाडौं । नेपालका १० जना उच्च पदस्थ व्यक्तिलाई ज्यान मार्ने धम्कीसम्बन्धी एक गम्भीर घटनाको अनुसन्धानमा नेपाल प्रहरी तीब्र रूपमा अगाडि बढेको छ । ‘एक्स्ट्रिमिस्ट ग्रुप अफ नेपाल’ नामक समूहका अध्यक्ष भएको दाबी गर्ने प्रकाश पाठकले ईमेलमार्फत अख्तियार दुरूपयोग अनुसन्धान आयोगका प्रमुख आयुक्त प्रेमकुमार राईसहित पूर्वमन्त्रीहरू आरजु राणा, रमेश लेखक, बालकृष्ण खाँण लगायत शीर्ष व्यक्तिहरूलाई निशाना बनाइने चेतावनी दिएका थिए ।

प्राप्त पत्रमा पाठकले आफूहरूको केन्द्रीय समिति ले १० जना ‘भ्रष्ट प्रशासक’ र ‘अस्थिर सरकार बनाउने’ व्यक्तिहरूलाई हटाउने निर्णय गरेको उल्लेख छ । राईलाई सम्बोधन गरिएको पत्रमा १० दिनभित्र राजीनामा दिनुपर्ने, अन्यथा हत्या गर्ने कार्यवाही अघि बढाइने दाबी गरिएको छ । साथै, केही दिनअघि कारागारबाट फरार भएका कैदीलाई साथमा लिएर आक्रमण गर्ने योजना रहेको पत्रमा उल्लेख छ । धम्कीसम्बन्धी ईमेलहरू प्राप्त भए लगत्तै नेपाल प्रहरीका विभिन्न निकायले अनुसन्धान सुरु गरेका छन् । अनुसन्धानमा संलग्न एक अधिकारीका अनुसार पाठक नेपालमै नरहेको प्रारम्भिक संकेत पाइएको छ । उनका अनुसार–‘विभिन्न युनिटहरूले अनुसन्धान गर्दैछन्, इमेल पठाउने व्यक्ति नेपालमा नभएको देखिन्छ ।’

अर्कोतर्फ, पाठकले आफ्नै फेसबुकमार्फत भिडियो सार्वजनिक गर्दै आफू त्यही समूहको अध्यक्ष भएको पुनः दाबी गरेका छन् । भिडियोमा उनले प्रमुख आयुक्त राईसहित १० जनाको हत्या गर्ने योजना सुनाएका छन् । उनले प्रहरी आफूमाथि निगरानी गरिरहेको थाहा पाएको र आफ्ना सहयोगीहरूमध्ये केही पक्राउ परिरहेको दाबी पनि गरेका छन् । उनका अनुसार, नेपाल प्रहरीले भारतका विभिन्न स्थानमा उनलाई खोजेको भए पनि आफू निरन्तर स्थान परिवर्तन गरिरहेकाले समात्न नसकेको बताएका छन् ।

‘म एक घण्टामा चार ठाउँ परिवर्तन गरिरहेको छु’, भन्दै उनले राईलाई लक्षित गर्दै ‘मलाई समात्नु अगाडि आफ्नो ज्यानको सुरक्षा गर’ भन्ने चेतावनी पनि भिडियोमा दिएका छन् । घटना गम्भीर बनिरहेका बेला नेपाल प्रहरीको केन्द्रीय अनुसन्धान ब्युरो (सीआइबी) लगायत अन्य इन्टिलिजेन्स युनिटहरूले पाठकको खोजी र स्रोत पहिचानमा सक्रिय रूपमा काम गरिरहेका छन् । उनका समूहको वास्तविक आकार, संरचना र उद्देश्यबारे भने अहिलेसम्म खुलेको छैन ।