बुटवल । रूपन्देहीको कञ्चन गाउँपालिकामा एक १७ वर्षीय किशोरको बीभत्स हत्या भएको छ । कञ्चन गाउँपालिका–३, धौलागिरीचोक निवासी ईशान शर्मा पौडेलको शव बिहीबार साँझ स्थानीय एक नालीमा फेला परेको हो । बुधबार राति ८ बजेदेखि सम्पर्कविहीन भएका ईशानको खोजी गर्ने क्रममा बिहीबार साँझ ६ बजेतिर घर नजिकैको नालीमा मृत अवस्थामा फेला पारिएको जिल्ला प्रहरी कार्यालय रूपन्देहीले जनाएको छ । मृतकको टाउकोमा गम्भीर चोट लागेको र घटनास्थलको प्रकृति हेर्दा नियोजित रूपमा हत्या गरिएको देखिएको छ ।

जिल्ला प्रहरी कार्यालय रूपन्देहीका प्रमुख प्रहरी उपरीक्षक (एसपी) प्रदीप क्षेत्रीले घटनाको पुष्टि गर्दै दोषीको खोजी कार्य तीव्र पारिएको जानकारी दिए । ‘टाउकोमा प्रहार गरेर बीभत्स ढंगले हत्या गरिएको अवस्थामा शव फेला परेको छ ,’ एसपी क्षेत्रीले भने, ‘हामीले घटनास्थललाई घेराबन्दी गरेर सुक्ष्म अनुसन्धान सुरु गरिसकेका छौँ । घटनामा संलग्न रहेकाहरूको पहिचान गर्न स्थानीयसँग सोधपुछ र अन्य प्राविधिक पक्षको अध्ययन भइरहेको छ ।’

स्थानीय अर्जुन र रमा शर्मा पौडेलका एक्ला सन्तान ईशान स्थानीय बुद्धदिप बोर्डिङ स्कुलमा कक्षा ११ मा अध्ययनरत थिए । इलाका प्रहरी कार्यालय रुद्रपुरको टोलीले घटनास्थलको कानुनी प्रक्रिया पूरा गरी शवलाई पोस्टमार्टमका लागि बुटवल पठाएको छ । प्रहरीले घटनाको गाम्भीर्यलाई हेर्दै तालिमप्राप्त कुकुर र विज्ञ टोली परिचालन गरी अनुसन्धानलाई अगाडि बढाएको जनाएको छ । कञ्चन–३ का वडा सदस्य समेत रहेका छिमेकी दीपक अधिकारीका अनुसार केही दिन पहिले विद्यालय परिसरमा ईशान र साथीहरूबीच एक युवतीको विषयमा विवाद भएको थियो । ‘उनी कुनै कुलतमा भएको हामीले थापा पाएका थिएनौँ । तर आफ्ना कुरामा सधैँ अडिग रहने र नभए रिसाउने बानी थियो, केही दिनअघि विद्यालय परिसरमा युवतीलाई मन पराएको कुरालाई लिएर साथीहरूसँग विवाद भएको सुनिएको छ, यद्यपि प्रहरीको अनुसन्धानमा त्यो खुल्नेछ, अहिले

अनुसन्धानका लागि तीन जना समातिएका छन्’ उनले भने । २ गते साँझ जिम गर्न गएका उनी सँगै त्यहाँबाट निस्केका साथी समातिएको अधिकारीले सुनाए । ‘घरको डेढ सय मिटरमै रहेको नालीमा फालिएको थियो शव, टाउकोमा पछाडि पट्टी चोट छ, घटनास्थलमा केही रगत चुहिएको, लतपतिएको केही छैन, त्यसैले बाहिर हत्या गरेर त्यहाँ फालेको अनुमान गर्न सकिन्छ, आफूले मन परेको केटीलाई अरुले हेरेको विषयमा विवाद भएको रे । समूह मिलेर आक्रमण गरेको हुनसक्छ’, उनले भने ।