काठमाडौं । ललितपुरमा इनारभित्र बोरामा प्याक गरिएको शव भेटिएको घटनाले अनुसन्धानका क्रममा अर्को एक जघन्य हत्या पनि बाहिर आएको छ । सुरुमा एक व्यक्तिको हत्या मात्रै ठानिएको यो प्रकरण अहिले दोहोरो हत्याको रूपमा पुष्टि भएको छ । प्रहरीका अनुसार दोस्रो हत्या भएका व्यक्ति भोजपुरका २१ वर्षीय पारुहाङ राई हुन् । उनको शव भक्तपुर र ललितपुरको सीमानामा पर्ने सूर्यविनायक नगरपालिका–७ स्थित जंगल क्षेत्रमा फेला परेको हो । अनुसन्धानका क्रममा अभियुक्तले दिएको सूचनाका आधारमा प्रहरीले उक्त स्थानबाट शव बरामद गरेको जनाएको छ।

यसअघि पुस २ गते ललितपुरको महालक्ष्मी नगरपालिका–८ शेरफाँटमा रहेको एक इनारभित्र सिन्धुलीको गोलन्जोर गाउँपालिका–३ घर भएका केशवराज हायुको शव बोरामा प्याक गरिएको अवस्थामा भेटिएको थियो । उक्त घटनापछि प्रहरीले गहिरो अनुसन्धान थालेको थियो । अनुसन्धानको क्रममा प्रहरीको प्रारम्भिक निगरानीमा परेका देवराज ढुंगेललाई पक्राउ गरी सोधपुछ गर्दा उनले जयराज अधिकारीको संलग्नता रहेको बताएका थिए । त्यसपछि प्रहरीले जयराज अधिकारीलाई सिन्धुलीबाट आज बिहान नियन्त्रणमा लिएको हो । प्रहरीका अनुसार जयराज अधिकारीले सोधपुछका क्रममा पारुहाङ राईको हत्या पनि आफूहरूकै संलग्नतामा भएको स्वीकार गरेका छन् । उनले बताएअनुसार शव फालिएको स्थानमै पुगेर प्रहरीले पारुहाङको शव फेला पारेको हो ।

अपराध अनुसन्धान कार्यालयका एसएसपी रमेश बस्नेतले देवराज ढुंगेल र जयराज अधिकारीले केशवराज हायु र पारुहाङ राई दुवैको हत्या गरेको स्वीकार गरिसकेको जानकारी दिए । उनका अनुसार केशवराज हायुको हत्या मंसिर २४ गते र त्यसको भोलिपल्ट मंसिर २५ गते पारुहाङ राईको हत्या गरिएको प्रारम्भिक बयानमा उल्लेख छ । एसएसपी बस्नेतले घटनासँग जोडिएका अन्य पक्ष, हत्या गर्नुपर्ने कारण र सम्भावित थप संलग्न व्यक्तिहरूको खोजीका लागि अनुसन्धान अझै जारी रहेको बताए । प्रहरीले घटनालाई गम्भीर अपराधको रूपमा लिएर कानुनी प्रक्रिया अघि बढाइरहेको जनाएको छ ।