सिन्धुली । सिन्धुलीको कमलामाई नगरपालिका–४ धुराबजारमा पेट्रोल छर्केर आगो लगाई बुहारीको हत्या गरिएको घटनामा सासु र नन्दलाई प्रहरीले पक्राउ गरेको छ । आइतबार अपराह्न करिब साढे ४ बजेतिर ३२ वर्षीया सुशीला घिसिङ (बम्जन) भान्छा कोठामै जलेको अवस्थामा मृत भेटिएकी हुन् । प्रहरीका अनुसार ६२ वर्षीय दुर्गामान बम्जनको साढे दुईतले घरको भान्छामा पेट्रोल र मट्टितेल प्रयोग गरी आगजनी गरिएको प्रारम्भिक अनुसन्धानबाट खुलेको छ ।

घटनास्थलबाट पेट्रोल भरिएका र जलेका बोतल, लाइटर र राँको बरामद भएको जिल्ला प्रहरी कार्यालय सिन्धुलीले जनाएको छ । आगो निभाउने क्रममा दुर्गामान बम्जन घाइते भएका छन् र उनको उपचार भइरहेको छ । घटनास्थल शंकास्पद देखिएपछि प्रहरीले मृतककी सासु ५९-५० वर्षीया मायारानी बम्जन र नन्द ३५ वर्षीया मीना लामा (बम्जन) लाई नियन्त्रणमा लिएको हो । प्रारम्भिक सोधपुछमा मीना लामाले सुशीलामाथि पेट्रोल छर्केर आगो लगाएको स्वीकार गरेको प्रहरीको दाबी छ । मृतकका माइती पक्षले सासु–नन्दसँगै ससुरा दुर्गामान बम्जनविरुद्ध समेत किटानी जाहेरी दिएका छन् ।

जिल्ला प्रहरी कार्यालय सिन्धुलीका एसपी लालध्वज सुवेदीका अनुसार घटनामा संलग्न रहेको आशंकामा पक्राउ परेका दुवै जनामाथि ज्यान सम्बन्धी कसुर (कर्तव्य ज्यान) मुद्दा दर्ता गरिएको छ । जिल्ला अदालत सिन्धुलीबाट पाँच दिनको म्याद थप गरी अनुसन्धान अघि बढाइएको छ । मृतकको शव पोस्टमार्टमका लागि जिल्ला अस्पताल सिन्धुलीमा राखिएको छ ।

प्रहरीले पारिवारिक विवाद लामो समयदेखि चल्दै आएको र मृतकका श्रीमान कोरियामा रहेको तथ्य पनि अनुसन्धानको दायरामा राखेको जनाएको छ । यता, घटनापछि स्थानीयले दोषीलाई कडा कारबाही र मृतकलाई न्याय माग्दै जिल्ला प्रहरी कार्यालय सिन्धुलीको गेट अगाडि नाराबाजी गरेका छन्। स्थिति नियन्त्रणमा राख्न प्रहरीले सुरक्षा व्यवस्था कडा पारेको छ ।