सर्लाही । सर्लाहीको ईश्वरपुर नगरपालिका–२ स्थित सागरनाथ वन विकास परियोजनाको जंगल क्षेत्रमा कार्यरत वन रक्षक (पाले) रामेश्वर (रामईश्वर) महतोको हत्या प्रकरणमा प्रहरीले एक जनालाई पक्राउ गरेको छ । घटनास्थल नजिकै महतोको टाउको फेला परेको छ भने पक्राउ परेका व्यक्तिको कपडामा रगतको दाग भेटिएको प्रहरी र प्रशासनले पुष्टि गरेको छ ।

जिल्ला प्रहरी कार्यालय सर्लाहीका अनुसार शनिबार बिहान वन क्षेत्रमा रुख काटिएको आवाज सुनेपछि महतो साइकलमा सोतर्फ गएका थिए । अबेरसम्म घर नफर्किएपछि खोजतलास सुरु गरिएको थियो । सोही दिन जंगलको झाडीमा टाउको बिनाको शव फेला परेको थियो । त्यसपछि अनुसन्धान तीव्र पार्दै धनुषाको लालगढबाट कुकुरसहित विशेष अनुसन्धान टोली परिचालन गरिएको थियो ।

प्रहरी निरीक्षक नितेश कुमार सिंहका अनुसार आइतबार दिउँसो घटनास्थलबाट करिब १०० मिटर उत्तरतर्फको झाडीमा महतोको टाउको फेला परेको हो । शव भने घरदेखि करिब ५०० मिटरको दूरीमा पर्ने परियोजनाको जंगल क्षेत्रमा भेटिएको थियो । हत्याको आशंकामा ईश्वरपुर नगरपालिका–२ राइटरखोरका रामवली महतोलाई पक्राउ गरी अनुसन्धान भइरहेको छ । प्रमुख जिल्ला अधिकारी रामुराज कडरियाले पक्राउ परेका व्यक्तिको कपडामा रगत लागेको पाइएको र त्यसले घटनामा संलग्नताको आशंका बलियो बनाएको बताए । प्रहरीले सोधपुछ र थप प्रमाण संकलन गरिरहेको जनाइएको छ ।

स्थानीयका अनुसार कर्तव्यपालनका क्रममा वन तस्करी रोक्न गएका बेला महतोमाथि आक्रमण भएको आशंका गरिएको छ । घटनापछि ईश्वरपुर क्षेत्रमा त्रासको वातावरण बनेको वडा अध्यक्ष सुरेन्द्रबहादुर कार्कीले बताएका छन् । यसैबीच, सागरनाथ वन विकास परियोजनाको व्यवस्थापनले घटनापछि आकस्मिक बैठक बसेर महतोको योगदानको कदर गर्दै उनलाई संरक्षण शहीद घोषणा गर्न पहल गर्ने निर्णय गरेको छ । परियोजना व्यवस्थापक खेमलाल सेन्चुरीका अनुसार अन्तिम दाहसंस्कार र किरिया खर्चका लागि तत्काल २५ हजार रुपैयाँ उपलब्ध गराइने, कर्मचारीहरूबाट कम्तीमा एक दिनको तलब बराबरको रकम सहयोगस्वरूप संकलन गरी परिवारलाई दिने, तथा देशभरबाट राहत संकलन गरी हस्तान्तरण गर्ने निर्णय गरिएको छ।

त्यसैगरी आश्रित परिवारका एक सदस्यलाई परियोजनामै महतोको पदमा तत्काल रोजगारी दिने, नेपाल सरकार तथा वन पैदावार विकास समिति केन्द्रीय कार्यालयमार्फत नियमानुसार क्षतिपूर्तिका लागि पहल गर्ने निर्णय पनि गरिएको छ । प्रहरीले घटनाको अनुसन्धान द्रूत गतिमा भइरहेको र दोषी पहिचानको अन्तिम चरणतर्फ अघि बढिरहेको जनाएको छ ।