सिन्धुली । पुस २९ गते साँझ सिन्धुलीको घ्याङलेख–२ हायुटारस्थित एसबिआई बैंक शाखामा भएको तीन करोड ७ लाख रुपैयाँको लुटपाटमा सात जनालाई पक्राउ गरिएको छ । पक्राउ परेकामध्ये बैंकको घरधनी छविलाल स्याङतान र उनका जेठान चतुरमान बज्यु मुख्य संलग्न व्यक्ति हुन् ।

जिल्ला प्रहरी प्रमुख एसपी लालध्वज सुवेदीका अनुसार, राति साढे ७ बजे लुटेराहरूले बैंकमा प्रवेश गरी सुरक्षागार्ड र कर्मचारीलाई नियन्त्रणमा लिएका थिए । बैंकभित्र प्रवेश गर्दा उनीहरूले प्लाष्टिकको पेस्तोल देखाएर ताल्चा खोलाएका थिए । सुरक्षागार्ड रुद्रबहादुर कार्कीलाई सामान्य घाइते बनाएपछि उनीहरूले पैसा बोरा र झोला भित्र राखेर जंगलतर्फ भागेका थिए ।

घटनामा ठूलो समूह संलग्न रहेको प्रहरीले जनाएको छ । बैंकबाट फरार भएकाहरूमध्ये केहीलाई करिब दुई किलोमिटर पूर्व लिपिखोलामा नियन्त्रणमा लिइएको थियो । प्रहरीले जंगल र विभिन्न स्थानमा लुकाइएको रकम पनि फेला पारेको छ। प्रारम्भिक खोजीमा २ करोड ६८ लाख ५५ हजार १७५ रुपैयाँ बरामद भएको छ भने बाँकी रकमको खोजी जारी छ ।

पक्राउ परेकामध्ये भागवतसिंह थापा (काभ्रेपलाञ्चोक, ४२ वर्ष), चतुरमान बज्यु (सिन्धुली, ४७ वर्ष), शशांक श्रेष्ठ (चितवन, २४ वर्ष), मिलन गिरी (नुवाकोट, २३ वर्ष), विवेक मगर (नुवाकोट, १९ वर्ष), छविलाल स्याङतान (सिन्धुली, ४४ वर्ष) र एक १६ वर्षीय नाबालक रहेको प्रहरीले जनाएको छ ।

एसपी सुवेदीले घटनाको योजनासम्बन्धी जानकारी पनि दिएका छन् । उनका अनुसार लुटपाटको योजना गत असोजदेखि नै बनाइएको थियो । पुस २३ गते पहिलो प्रयास असफल भएपछि पुस २८–२९ गते दोश्रो प्रयास सफल भएको थियो । बैंकको घरधनी स्याङतानले आवश्यक हातहतियारको व्यवस्था र सूचना आदानप्रदान गरेको पाइएको छ । प्रहरीले बाँकी रकम र अन्य संलग्न व्यक्तिहरूको खोजी जारी राखेको छ । पक्राउ परेकाहरूलाई अनुसन्धानका लागि जिल्ला अदालतबाट पाँच दिन हिरासत अनुमति लिइएको छ ।