काठमाडौं । नेपाली बजारमा दिन प्रतिदिन सुन ‘आकाशको फल आँखा तरी मर्’ जस्तै हुँदै गएको छ । दिनहुँ कीर्तिमान राख्दै सुनको भाउ अत्यधिक बढिरहेको छ ।

नेपाल सुनचाँदी व्यवसायी महासंघका अनुसार बिहीबार सुनको मूल्य तोलामै २० हजार ५०० रुपैयाँले बढेको छ । यो इतिहासकै सर्वोच्च मूल्य हो ।

बढेको मूल्यमा सुन किन्न उपभोक्ताले तोलामै तीन लाख ३९ हजार ३०० रुपैयाँ खर्चिनुपर्ने भएको छ । यसअघि बुधबार प्रतितोला तीन लाख १८ हजार ८०० रुपैयाँमा सुन किनबेच भएको थियो ।

चाँदीको मूल्यसमेत बढेको छ । बिहीबार तोलामा २०५ रुपैयाँले बढेर सात हजार ५०५ रुपैयाँमा चाँदी किनबेच भइरहेको महासंघले जनाएको छ ।

बुधबार भने प्रतितोला सात हजार ३०० रुपैयाँमा चाँदी किनबेच भएको थियो ।