तेहरान। तेहरानले वाशिङ्गटनसँग भविष्यको वार्ताको रूपरेखा तयार गरिरहेको इरानका उच्च कूटनीतिज्ञ अब्बास अराघचीले बुधबार संयुक्त राष्ट्रसङ्घको आणविक निगरानी संस्थासँगको टेलिफोन वार्ताको क्रममा बताउनुभएको छ।

इरानको विदेश मन्त्रालयले जारी गरेको विज्ञप्तिमा भनिएको छ, “आइएइएका प्रमुख राफेल ग्रोसीसँगको कुराकानीमा अराघचीले भविष्यको वार्तालाई अगाडि बढाउनका लागि प्रारम्भिक र सुसङ्गत ढाँचाको मस्यौदा तयार गर्नमा इरानको ध्यान केन्द्रित गर्न जोड दिनुभएको छ ।

जेनेभामा इरान र संयुक्तराज्य अमेरिकाबीच ओमानको मध्यस्थतामा भएको दोस्रो चरणको वार्ताको भोलिपल्ट यो फोन वार्ता भएको हो ।

अराघचीले मङ्गलबार भन्नुभयो, “तेहरानले द्वन्द्वबाट बच्नका लागि सम्झौताका लागि ‘मार्गदर्शक सिद्धान्तहरू’ मा सहमति जनाएको छ।” यसबारे अमेरिकी उपराष्ट्रपति जेडी भान्सले भन्नुभयो, “तेहरानले वाशिङ्गटनको सबै ‘सीमा सर्त’ लाई अझै स्वीकार गरेको छैन।”

अमेरिकी ऊर्जा मन्त्री क्रिस राइटले पनि बुधबार वाशिङ्गटनले तेहरानलाई ‘कुनै न कुनै तरिकाले’ आणविक हतियार प्राप्त गर्नबाट रोक्ने बताउनुभएको छ ।

भियनामा रहेको इरानी नियोगका अनुसार बुधबार भियनामा आइएइएका लागि इरानका स्थायी प्रतिनिधि रेजा नजाफीले ग्रोसी र मित्र राष्ट्रहरू चीन र रुसका राजदूतहरूसँग संयुक्त बैठक गरी एजेन्सीको बोर्ड अफ गभर्नरको आगामी बैठक र इरानको आणविक कार्यक्रमसँग सम्बन्धित घटनाक्रमबारे विचार आदानप्रदान गर्नुभएको थियो ।

तेहरानले आइएइएसँगको केही सहयोग निलम्बन गरेको छ र वाचडगका निरीक्षकहरूलाई जूनमा १२ दिने युद्धको क्रममा इजरायल र संयुक्त राज्य अमेरिकाले बमबारी गरेको स्थलहरूमा पुग्न प्रतिबन्ध लगाएको छ ।

संयुक्त राष्ट्र सङ्घीय निकायले इरानमाथि भएको आक्रमणबारे पूर्वाग्रही बनेको र आक्रमणको निन्दा नगरेको आरोप इरानले लगाएको छ ।

हालैका हप्ताहरूमा यस क्षेत्रमा वाशिङ्गटनको सैन्य निर्माणको बीचमा इरानमा अमेरिकी सैन्य हस्तक्षेपको सम्भावनालाई रोक्न कूटनीतिक प्रयासहरू जारी छन्।