गौरीगञ्ज । गौरीगञ्जका बासिन्दाले चुनावमा भोट हाल्दा आफ्नो हात सूर्य बाहेक अन्त नजाने बताएका छन्। बुधबार गौरीगञ्ज–५ को श्यामाटोली पुगेका एमाले अध्यक्ष तथा पूर्वप्रधानमन्त्री केपी शर्मा ओलीसँगको भेटमा उनीहरूले विगतदेखि नै नेकपा एमालेलाई जिताउँदै आएको र यसपटक पनि जिताएरै छोड्ने अडान दोहोर्‍याए।

स्थानीय होवोदेवी राजवंशीले भनिन्, “हामी त जुगदेखि एमाले हौँ। सूर्य बाहेक अन्त भोट हालेकै छैनौँ। यसपटक पनि सुर्यमै हाल्ने हो।” उनले यस क्षेत्रमा बाटो विस्तार गरी बिजुलीको सेवा सहज बनाउन ओलीसँग आग्रह गरिन्।

त्यस्तै सोही ठाउँका किरण गनगाईले बाटो र बिजुली केही नभएको ठाउँमा ओलीले नै विकास गरेको भन्दै बाँकी विकासको जिम्मा पनि उनैलाई दिन सुर्यमै भोट हाल्ने बताए। “अरू कसले गर्छ र जिताउनु?” उनले भने, “जसले गर्छ, उसैलाई त हो भोट दिने।”

रतुवा खोलाको तटबन्ध थप बलियो बनाउन आवश्यक रहेको भन्दै अर्का स्थानीय सुकदेव सिंहले अब ओलीको जितपछि यी काम पूरा हुने विश्वास व्यक्त गरे।

सिमावर्ती गौरीगञ्जको उक्त गाउँमा पुग्दा एमाले अध्यक्ष ओलीलाई राजवंशी, सन्थाललगायत आदिवासी समुदायका स्थानीयले हर्षोल्लासका साथ स्वागत गरे। काखमा नानी च्यापेर आएका महिलाहरूले समेत ओलीसँग मातृभाषामा संवाद गरेका थिए।