झापा । बिर्तामोड नगरपालिका-४ मा सञ्चालनमा रहेका दुई उद्योगमा आज बिहान आगलागी हुँदा ठूलो क्षति भएको छ।

जिल्ला प्रहरी कार्यालय झापाका सूचना अधिकारी खगेन्द्रबहादुर खड्काका अनुसार बिहान करिब ४ः१५ बजे झापाली चिप्स फ्याक्ट्री र सौगात काष्ठ फर्निचरमा एकैसाथ आगलागी भएको हो। ती उद्योग क्रमशः भक्तिप्रसाद उप्रेती र चन्द्रप्रसाद खरेलले सञ्चालन गर्दै आएका थिए।

आगलागीका कारण दुवै उद्योगका कच्चा पदार्थ, तयारी सामग्री तथा मेसिनरी उपकरण पूर्ण रूपमा जलेर नष्ट भएका छन्। प्रारम्भिक अनुमानअनुसार करिब एक करोड रुपैयाँ बराबरको क्षति भएको प्रहरीले जनाएको छ।

घटनापछि इलाका प्रहरी कार्यालय बिर्तामोड, सशस्त्र प्रहरी बेस क्याम्प शनिश्चरेका सुरक्षाकर्मी, साथै बिर्तामोड नगरपालिका, भद्रपुर नगरपालिका र मेचीनगर नगरपालिकाका दमकलको सहयोगमा आगो नियन्त्रणमा लिइएको हो। स्थानीय बासिन्दाले समेत आगो निभाउन सहयोग गरेका थिए।

प्रहरीका अनुसार आगलागीको कारण हालसम्म खुल्न सकेको छैन भने घटनाबारे थप अनुसन्धान भइरहेको छ।