सर्वोच्च अदालतले पूर्वऊर्जा मन्त्री एवं नेपाली कांग्रेसका नेता दीपक खड्कालाई थुनामुक्त गर्न आदेश दिएको छ । कायममुकायम प्रधानन्यायाधीश सपना प्रधान मल्ल र न्यायाधीश श्रीकान्त पौडेलको संयुक्त इजलासले खड्काको थुना कानुनसम्मत नभएको ठहर गर्दै यस्तो आदेश जारी गरेको हो ।

सम्पत्ति शुद्धीकरणको आरोपमा केन्द्रीय अनुसन्धान ब्युरोद्वारा चैत १५ गते पक्राउ परेका खड्काको रिहाइका लागि उनकी पत्नी विनिता थापाले बन्दीप्रत्यक्षीकरणको रिट दायर गरेकी थिइन्।

अदालतले खड्कालाई विदेश जानका लागि भने पूर्वस्वीकृति लिनुपर्ने सर्त राखेको छ। साथै, सर्वोच्चले पूर्व नजिरलाई आधार मान्दै खड्कालाई लागेको अभियोगमा मिलापत्र हुन सक्ने सम्भावनासमेत आदेशमा औंल्याएको छ ।