काठमाडौं । नेपाली कांग्रेसका सभापति गगन कुमार थापाले पार्टीभित्र देखिएको असन्तुष्टि हटाउँदै वृहत्तर एकता निर्माण गर्ने उद्देश्यले शीर्ष नेताहरूसँग राजनीतिक संवाद सुरु गरेका छन्।

यसै क्रममा उनले आइतबार साँझ निवर्तमान कार्यवाहक सभापति पूर्ण बहादुर खड्कासँग गोल्फुटारस्थित खड्का निवासमा भेटवार्ता गरेका हुन्।

भेटपछि सभापति थापाले पार्टी एकता आफ्नो पहिलो दायित्व भएको उल्लेख गर्दै वरिष्ठ नेताहरूसँग निरन्तर संवादमार्फत संगठनलाई फेरि सबल बनाउने प्रक्रिया अघि बढेको बताए।

उनले सञ्चारकर्मीसँग भने, ‘पार्टीको वृहत्तर एकताका लागि सिनियर नेताहरूसँग छलफल सुरु गरेको छु। सर्वोच्च अदालतको निर्णयले कांग्रेसभित्रको एकतालाई थप मजबुत बनाउने वातावरण तयार भएको छ।’

उनका अनुसार पार्टीलाई भित्रैबाट सुदृढ बनाउँदै आगामी यात्रामा साझा दृष्टिकोणसहित अघि बढ्न अहिलेको समय महत्वपूर्ण अवसर बनेको छ।

यसैबीच, पन्ध्रौँ महाधिवेशनको तयारी अघि बढिसकेको भन्दै सभापति थापाले सबै नेता तथा कार्यकर्तालाई महाधिवेशनलाई सफल बनाउन जुट्न आह्वान गरेका छन्।

उनले महाधिवेशनलाई कांग्रेसको रूपान्तरण, सुदृढीकरण र भविष्यको दिशा तय गर्ने मोडका रूपमा उपयोग गर्नुपर्ने आवश्यकता औंल्याएका छन्।