एजेन्सी। मलेसियाको उत्तरी बोर्नियो राज्य सबाको एक तटीय गाउँमा आइतबार बिहान भएको भीषण आगलागीमा झन्डै एक हजार घर जलेर नष्ट भएका छन्। घटनाबाट ९ हजारभन्दा बढी स्थानीय बासिन्दा प्रभावित भएका छन्।

सान्दाकन जिल्लाका अग्नि नियन्त्रण प्रमुख जिमी लागुङका अनुसार आगलागी करिब ४ हेक्टरभन्दा बढी क्षेत्रमा फैलिएको थियो। भाटाको समय परेकाले पर्याप्त पानीको स्रोत जुटाउन कठिनाइ हुँदा आगो नियन्त्रणमा चुनौती भएको उनले बताए।

सान्दाकन नगरपालिकाका अध्यक्ष वाल्टर केन्सनका अनुसार निरीक्षणपछि प्रभावित क्षेत्र बसोबासका लागि असुरक्षित ठहर गरिएको छ र घटनालाई विपद्का रूपमा घोषणा गरिएको छ।

स्थानीय समयअनुसार मध्यरात १ः३२ बजे सुरु भएको आगलागी दिउँसो करिब १२ बजे मात्र नियन्त्रणमा आएको थियो। घटनामा कुनै मानवीय क्षति नभएको जनाइएको छ।

प्रभावित परिवारहरूका लागि अस्थायी आवासको व्यवस्था मिलाउने काम स्थानीय प्रशासनले सुरु गरेको छ।