एजेन्सी। अमेरिकाको श्रिभपोर्ट, लुइजियाना मा भएको गोलीकाण्डमा १ देखि १४ वर्ष उमेर समूहका ८ जना बालबालिकाको ज्यान गएको छ। स्थानीय प्रहरीले घटनालाई घरेलु विवादसँग जोडिएको प्रारम्भिक निष्कर्ष निकालेको जनाएको छ।

प्रहरीका अनुसार स्थानीय समयअनुसार सोमबार बिहान करिब ५ बजे घटना सुरु भएको थियो। एक बन्दुकधारीले अचानक १० जनामाथि अन्धाधुन्ध गोली प्रहार गरेका थिए।

गोलीकाण्डपछि हमलाकारी चोरी गरिएको गाडीमा भागेका थिए। घटनालगत्तै प्रहरीले खोजी अभियान तीव्र बनाउँदै संदिग्धलाई पछ्याएको थियो। सो क्रममा प्रहरीले हमलाकारीमाथि गोली प्रहार गर्दा उनी मारिएका छन्।

घटनामा घाइतेहरूको अवस्था र हमलाकारीको पहिचानबारे थप विवरण आउन बाँकी रहेको प्रहरीले जनाएको छ। यस घटनाले स्थानीय समुदायमा त्रास र शोकको वातावरण सिर्जना गरेको छ भने प्रहरीले विस्तृत अनुसन्धान जारी राखेको छ।