काठमाडौँ । राष्ट्रिय स्वतन्त्र पार्टीका सांसद गणेश कार्कीले भूमि आयोगबाट भएका कामहरू अब बन्ने संयन्त्रले अगाडि बढाउनुपर्ने बताएका छन्।

सरकारले हालै अध्यादेशमार्फत तत्कालीन प्रधानमन्त्री केपी शर्मा ओलीको पालामा बनेको भूमि आयोग खारेज गर्ने निर्णय गरेको थियो। सरकारको उक्त निर्णयप्रति प्रतिक्रिया जनाउँदै उनले भूमि आयोग खारेज भए पनि त्यसले गरिरहेका कामहरूले निरन्तरता पाउनुपर्ने बताएका हुन्।

‘भूमि आयोग खारेज भए पनि भूमि आयोगबाट भएका कामहरू अब बन्ने संयन्त्रले स्वामित्व लिएर त्यहाँबाट नै अगाडि बढ्ने छ,’ उनले सामाजिक सञ्जाल फेसबुकमा लेखेका छन्।

साथै उनले ऐलानी जग्गामा बस्ने नागरिक अपराधी नभएर वास्तविक पीडित भएको पनि जिकिर गरेका छन्। रास्वपा सांसद केपी खनाल लगायत अन्य केही सांसदको ऐलानी जग्गामा घर रहेको प्रकरण बाहिरिएपछि उनले यस्तो बताएका हुन्। उनका अनुसार फर्जी सुकुम्बासी कारबाहीको विषय भए पनि ऐलानी जग्गामा बस्ने नागरिक अपराधी होइनन्।

उनले अगाडि लेखेका छन्, ‘जानकारीका लागि, फर्जी सुकुम्बासी भने कानुनी कारबाहीको विषय हो। तर ऐलानी जग्गामा बस्नेहरू वर्षौँदेखिका पीडित हुन्, अपराधी होइनन्।’